२७ माघ, काठमाडौं ।
गैर आवासीय नेपाली संघले सरकारी सम्पत्ति हिनामिना गर्नेमाथि कडा कारवाही हुनुपर्ने जनाएको छ।
बालुवाटारमा जग्गा किनेर आफ्नो कार्यालय भवन बनाइरहेको संघ प्रवक्ता डीबी क्षेत्रीले सोमबार विज्ञप्ति जारी गर्दै बालुवाटार जग्गा प्रकरणमा संघ पनि ठगीमा परेर पीडित भएको जनाएका छन्।
ललिता निवास जग्गा हिनामिना प्रकरणमा अख्तियार दुरुपयोग अनुसन्धान आयोगले संघलाई समेत विपक्षी बनाई मुद्दा दायर गरेको खवरप्रति संघको ध्यानाकर्षण भएको भन्दै क्षेत्रीले स्पष्टीकरण दिएका हुन्।
संघले २०७२ जेठ १४ मा १२ करोड ७२ लाख रुपैयाँ वैधानिक रुपमा बैंकमार्फत भुक्तानी गरेर बालुवाटारको ३ रोपनी जग्गा किनेको विज्ञप्तिमा उल्लेख छ। सम्बन्धित निकायबाट अनुमति लिएर भवन पनि निर्माण भइसकेको उनले जनाएका छन्।
संघले खरिद गर्न लागेको जग्गाको विवरणसहित राजस्व मिनाहाका लागि नेपाल सरकारमा निवेदन दिएको थियो। भूमीसुधार तथा व्यवस्था मंत्रालयको प्रस्ताव अनुसार ०७२ बैशाख ३१ को मन्त्रीपरिषद्को निर्णयबाट ५० लाख ८८ हजार बराबरको राजश्व समेत मिनाहा भएको थियो।
विधिवत रुपमा संघको नाममा जग्गा पास भएपछि अनुमति लिएर निर्माण प्रक्रिया थालिएको भवनबाट एनआरएनएले आफ्ना नेपाल गतिविधि सञ्चालन गरिरहेको छ।
संघ मुलुकको कानुनको अक्षरस पालना गर्नु पर्छ भन्ने कुरामा प्रतिबद्ध छ । राज्यको संपत्तिको हिनामिना हुनु हुँदैन र हिनामिनामा संलग्न व्यक्ति माथि कडा कारवाही हुनु पर्छ भन्ने कुरामा आम नेपाली नागरिक सरह हाम्रो पनि चासो र सहमति छ, विज्ञप्तिमा भनिएको छ, हामी कुनै पनि अवस्थामा सरकारी सम्पत्तिलाई कानुन बिपरित निजि बनाउन दिनु हुँदैन भन्ने पक्षमा छौं।
