१ फागुन, चितवन । बुधबार स्कुटर दुर्घटनामा परि नेपाली नायिका महिमा सिलवालको निधन भएको छ ।
काठमाडौंबाट चितवन जानेक्रममा महिमाले चलाएको बा ९८ प ७०५८ नम्बरको स्कुटर भैरहवाबाट काठमाडौं आइरहेको लु २ ख १३५ नम्बरको बससँग ठक्कर खाँदा उनको निधन भएको हो।
घटनामा सो स्कुटरमा सवार उनकी बहिनी शर्मिला सिलवालको पनि निधन भएको प्रहरीले बताए । घटना बुधबार साँझ ५ः४५ बजे गजुरी गाउँपालिका, वडा नम्बर २ चाम्बासमा घटेको हो ।
महिमाको उपचारका क्रममा गजुरी स्वास्थ्य केन्द्रमा र शर्मिलाको ट्रमा सेन्टर काठमाडौंमा निधन भएको हो । प्रहरीका अनुसार घुम्ती क्रस गर्ने क्रममा स्कुटी र बस एकआपसमा ठोक्किएका हुन्। उनले बसका चालकलाई नियन्त्रणमा लिएर अनुसन्धान गरिरहेको जनाएको छ।
’कारवाही’ सिनेमाबाट नेपाली रजतपटमा डेब्यू गरेकी अभिनेत्री महिमाले ’अप्रिल फुल’, ’चियर्स’, ’दानव’, ’जिग्लो’ आदि सिनेमामा अभिनय गरेकी छिन्। सिनेमाका अलावा म्यूजिक भिडियो अभिनयमा पनि उनको सक्रियता थियो। महिमा भरतपुर महानगरपालिका–१२ शिवनगरकी स्थायी बासिन्दा हुन्।
