२ फागुन, जनकपुर । अवैद्य रुपमा भइरहेको नदीजन्द पदार्थको उत्खनन रोक्न गएका धनुषाको मिथिला नगरपालिका वडा नं. ५ का २४ वर्षीय दिलिप भनिने ओमप्रकाश महतोको हत्या आरोपमा पक्राउ परेका मध्ये तीनजना पूर्पक्षका लागि कारागार चलान भएका छन् । तीन जना भने धरौटीमा छुटेका छन् ।
क्रसर सञ्चालक बिपिन कुमार महतो, टिपर चालक मुनिन्द्र महतो र लोडर चालक जितेन्द्र कुमार महतोलाई जिल्ला अदालत धनुषाका न्यायाधीश केशव प्रसाद घिमिरेको इजलासले पूर्पक्षका लागि कारागार चलान गर्न आदेश गरेको हो ।
त्यस्तै दिलिपका साथी रोशन यादव, सत्यनारायण महतो र सत्रुधन महतो २५/२५ हजार रुपैयाँ धरौटी राखेर तारेखमा रिहा भएका छन् । गत पुस २५ गते मिथिला नगरपालिका वडा नं. ५ श्रीपुरका २४ वर्षीय दिलिपले अवैध उत्खन्न भइरहेको खबर पाएपछि आफ्नो गाउँकै छेउमा रहेको औरही खोलामा अवैध उत्खनन् रोक्न जाँदा पहिला फलामको लिभरले दाहिने कोखामा हानी घाइते बनाई टिपरले किचेर हत्या गरिएको थियो ।
