विराटनगर, चैत ८
प्रदेश नं १ का आन्तरिक मामिला तथा कानुन मन्त्री हिक्मत कार्कीले अहिलेको अवसथामा कानुन नभएपनि प्रदेशका सबै सरकारी संरचना प्रदेश सरकार मातहत रहने बताएका छन् ।
कानुनको अभाबमा प्रदेश सरकार प्रभाबकारी रुपमा सक्रिय हुन नसकेको बेला मन्त्री कार्कीले कानुन नभएपनि प्रदेशका सरकारी संरचना परिचालन गर्न सरकारलाई समस्या नभएको बताए ।
नेपाल प्रहरी गृह मन्त्रालय मातहत रहने भएपनि प्रदेश प्रहरीको संरचना नबन्दा प्रदेश सरकारको समन्वयमा परिचालन हुने मन्त्री कार्कीले दावी गरेका छन् । प्रमुख जिल्ला अधिकारी गृह मन्त्रालय मातहत रहेपनि छिट्टै प्रदेश मातहत आउनेगरी संघीय सरकारले निर्णय गर्ने उनले बताए ।
उनले प्रदेश सरकारको मातहत रहने प्रदेश प्रहरीको संरचना नबनेसम्म नेपाल प्रहरीसँगको समन्वयमा प्रदेश सरकारले प्रदेशको शान्ति सुरक्षासँग सम्बन्धित काम गर्ने मन्त्री कार्कीले जानकारी दिए ।
आन्तरिक मामिला तथा कानुन मन्त्रालयले यसअघि प्रदेश सरकारले तय गरेको सय दिने कार्यक्रम अनुसारको आफ्नो कार्ययोजना सार्वजनिक गर्न बिहीबार आयोजना गरेको पत्रकार सम्मेलनमा मन्त्री कार्कीले कानुन अभाबको कारण उत्पन्न जटिलता संघीय सरकारले फुकाईदिने पनि बताए ।
प्रदेश सरकारले आफ्नो कानुन निर्माणको कामलाई तीब्रता दिएको जानकारी दिँदै मन्त्री कार्कीले प्रदेशका कतिपय संरचना संघीय कानुन बनेपछि मात्र बन्ने भएकोले त्यस्ता कानुन बनाउन संघीय सरकारले पनि प्राथमिकता दिने बताए ।
