७ चैत, काठमाडौं । विश्वव्यापीरूपमा फैलिरहेको कोरोना भाइरसको संक्रमण का कारण अदालतहरूले कसरी काम गर्ने भन्नेबारे निर्णय लिन भन्दै सर्वोच्च अदालतमा फूलकोर्ट बसेको छ । सर्वोच्च अदालतका सबै न्यायाधीशको बैठकलाई फूलकोर्ट भनिन्छ ।
फूलकोर्ट बस्ने भनेर आज कुनैपनि मुद्दाको पेशी तोकिएको छैन । सर्वोच्चले बिहीबारै आकस्मिक फूलर्कोट बस्ने भएकाले शुक्रबार पेशी नतोक्ने सूचना निकालेको थियो ।
केहीबेर अघिदेखि बैठक बसिरहेको सर्वोच्चका सञ्चारविज्ञ किशोर पौडेलले जानकारी दिए । मुलुकभरका अन्य अदालतमा भने काम भइरहेको छ ।
केही दिन अघि वकिलहरूको छातासंगठन नेपाल बार एशोसिएशनले अत्यावश्यकबाहेकका मुद्दा नहेर्न र अदालतको दैनिक कामकारबाही स्थगित गर्न सर्वोच्चलाई सुझाव दिएको थियो ।
उक्त सुझावपछि प्रधानन्यायाधीश चोलेन्द्र शमशेर राणाले कोरोना भाइरस संक्रमणबाट जोगिन के गर्ने भन्नेबारे निर्णय लिन फूलकोर्ट बोलाएका हुन् । यो बैठकले अत्यावश्यकबाहेक मात्रै मुद्दा हेर्ने र अदालतका अरू कामकारबाही बन्द गर्ने वा नगर्ने भन्ने बारे निर्णय लिनेछ ।
