११ चैत, काठमाडौं । भारतको सीमामा रहेका नेपालीलाई के गर्ने भन्ने विषयमा ३ बजे छलफल हुने भएको छ । भारत र नेपाल दुबैतिर लकडाउन हुँदासमेत आइरहेका नेपालीलाई कसरी व्यवस्थापन गर्ने भनेर छलफल गर्न उच्चस्तरीय राजनीतिक समन्वय समितिको बैठक बोलाइएको हो ।
सोचेको भन्दा धेरै भीड सीमा नाकामा रहेकाले यसबारे निर्णय हुन बाँकी रहेको कृषि मन्त्री घनश्याम भुषालले बताएका छन् ।
’सीमा लकडाउन गरेको सूचना पाउन ढिलो भयो कि भनेर हामीले नाका रहेका नागरिकलाई स्वदेश आउन दिने भनेको हो,’ भुषालले भने,’हामीले देशभित्र समेत लकडाउन गर्दा पनि नेपाल आउने क्रम नरोकिएपछि यो समस्या आइरहने देखेका छौं। त्यसैले के गर्ने भनेर छलफल गर्न लागिएको हो।’
आइतबार बसेको मन्त्रिपरिषद बैठकले सीमानामा लकडाउन गर्ने निर्णय गरेको थियो भने सोमबार बसेको उच्चस्तरीय समन्वय समितिको बैठकले नेपालभित्र पनि लक डाउन गर्ने निर्णय गरेको हो ।
अहिले कञ्चनपुरका गड्डाचौकी र कैलालीको गौरीफन्टा नाकामा सयौं नेपाली जम्मा भएका छन्। उनीहरूले नेपालमा आउन पाउनु पर्ने माग गर्दै नाराबाजी गरिरहेका छन् । प्रहरीले रोक्न खोजेपछि केहीबेर झडप पनि भएको थियो ।
