६ बैशाख, काठमाडौँ ।
भुटानको सरकारी ध्वजाबहाक वायुसेवा ड्र्यक एयरले लकडाउनका कारण नेपालमा अलपत्र परेका आफ्ना दुई जना नागरिकलाई उद्धार गरेको छ । शनिबार बिहान ७ः५३ बजे रित्तै काठमाडौंमा अवतरण गरेको ड्र्यक एयरको ब्रान्ड–न्यू एटीआर–४२–६०० जहाजले भुटानी नागरिक (एकजना पाइलट र एकजना अभिनेत्री) लाई लिएर फर्केको हो ।
जहाज काठमाडौंमा अलपत्र परेर स्वदेश फर्किन अपिल गर्ने पाइलट सोनाम तोब्गे र अभिनेत्री उगेन छोदेनलाई ९ बजे लिएर फर्केको थियो।काठमाडौँको तिब्बत गेष्ट हाउसमा २८ दिनदेखि बसेको तर नेपालमा कोरोना भाइरसका विरामी बढ्न थालेपछि सार्क अफिसमार्फत् परराष्ट्र मन्त्रालयलाई उद्धारका लागि अपिल गरेको अभिनेत्री उगेनले बताइन् । काठमाडौंमा भुटानको दुताबास नभएकाले उनले सार्कमार्फत् आफ्नो सरकारसँग इमेलबाट पत्राचार गरेको बताइन्। उनी नेपाली चलचित्र ‘२ नम्बरी’को छायांकनका लागि नेपाल आएकी थिइन् । अभिनेत्री उगेनले अब २१ दिनको क्वारेन्टाइन बसाईपछि मात्रै आफ्नो घर जाने बताइन्।
काठमाडौंमा अरु भुटानी नागरिकको पनि खोजी भएपनि फर्किने २ जना मात्रै भएका थिए । उनीसँगै १ घन्टा १५ मिनेटको उडानमा फर्किएका अर्का पाइलट सोनाम काठमाडौंमा रहेको निजी वायुसेवा कम्पनी हिमालय एयरलायन्समा आबद्ध भुटानी नागरिक हुन्। चार्टर उडान खर्च भने यी दुवैले मिलेर जुटाएको उनले बताइन्।
