७ वैशाख, सिरहा ।
सिरहाको सुखिपुर नगरपालिकामा राहत माग गर्दै स्थानीयले नगरपालिका कार्यालयमा ढुङ्गामुढा गरेका छन् ।
कोरोना भाइरसका कारण २७ दिन देखि बन्दाबन्दी खेप्दै आएका यहाँका विपन्न, गरिब, दलित तथा ज्याला मजदुरहरुले आइतबार अपराह्वन कार्यालयमा ढुङ्गामुढा गरेका हुन् ।
सिरहाको सुखिपुर नगरपालिकाले हाल सम्म राहत वितरणको लागि तथ्यांक संकलनमा पक्षपात गरेको र राहत वितरण नगरेको भन्दै उनीहरुले राहतको मागसहित नगरपालिकामा ढुङ्गामुढा गरेको स्थानीय चन्द्रमोहन चौधरीले बताए ।राहतको माग गर्दै कार्यालमा आएकाहरुलाई कर्मचारीले दुरव्र्यवहार गरेपछि ढुङ्गामुढा सुरुभएको स्थानीयले बताए ।
ढुङ्गामुढाबाट केही कर्मचारीहरुलाई चोट पटक लागेरको र कार्यालयका झ्यालका सिसाहरु फूटेको नगर प्रमुख रामऔतार यादवले जानकारी दिए । उनले केही मोरसाइकलमा पनि क्षति पुगेको समेत बताए ।
नगरपालीकामा लामो समयदेखि प्रशासकिय अधिकृत नभएकाले काम गर्न समस्या भएको यादवले बताए । नगरप्रमुख यादवले भने, ‘प्रशासकीय अधिकृत नभएकाले राहत वितरणमा समस्या भएको थियो । आजै नयाँ प्रशासकिय अधिकृत आईपुग्नु भएको छ । चाँडै राहत वितरण हुन्छ ।’
नेपाल प्रहरी, सशस्त्र प्रहरी र नेपाली सेनाले स्थानीयलाई सम्झाइ बुझाइ स्थिति नियन्त्रणमा लिएको जनाएको छ ।
