रारा जाने पर्यटकलाई गाउँमै बासको व्यवस्था

रारा वरिपरि रहेका झघट्ट, मुर्मा, झयारी, सल्लेरी, पिना, टोप्ला, ताल्च, माथीतुम, तलितुम र लामाचौरमा घरबासको व्यवस्था मिलाइएको प्रमुख जिल्ला अधिकारी उमाकान्त अधिकारीले बताए । ती गाउँमा वर्षभरि आउने पर्यटकलाई गाउँमै बास र स्थानीय खाना खुवाउने गरी घरबास (होमस्टे)सञ्चालन गर्ने गाउँलेले सहमति जनाएको र शुल्क पर्यटकको इच्छाअनुसार लिने समझदारी भएको उनले बताए ।

प्रजिअ अधिकारी, जिल्ला समन्वय समितिका प्रमुख पूर्णबहादुर रोकाया, छायाँनाथ रारा नगरपलिकाका प्रमुख हरिजंग शाही, उपप्रमुख सुल्तला रोकाया र पत्रकार महासंघको टोलीले १० वटै गाउँमा पर्यटकको बासका लागि पहल गरेका हुन् ।

गाउँलेकै सक्रियतामा प्रत्येक गाउँमा युवा समिति गठन गरिएको छ । ती समितिमा रहेका युवाले गाउँमा आउने पर्यटकलाई रारा घुमाउने, गाउँघरमा मदिरा नियन्त्रण गर्नेलगायत सामाजिक कार्य गर्नेछन् । वैशाख १ गते रारा तालबाट रारा कर्णाली पर्यटन वर्षको प्रधानमन्त्री केपी शर्मा ओलीले देशवासीको नाममा सम्बोधन गरी उद्घाटन गर्ने कार्यकक्रम रहेको छ । प्रधानमन्त्रीले उद्घाटन गरेपछि कर्णाली प्रदेशमा वर्षभरी विभिन्न कार्यक्रम गरेर पर्यटन वर्ष मनाइनेछ ।

पर्यटन वर्ष उद्घाटन कार्यक्रममा आउने आन्तरिक तथा बाह्य पर्यटकको चापको आँकलन गरी व्यवस्था मिलाइएको छ । उक्त दिन सञ्चार सेवा नियमित र इन्टरनेट सेवा तीव्र गतिको दिने नेपाल टेलिकम र वल्डलिंकले प्राविधिकलाई तयारी अवस्थामा राखेका छन् । प्राकृतिक सौन्दर्यको खानी रारामा फोहोरमैला व्यवस्थापनका लागि नेपाल टेलिकमले प्लास्टिक डस्बिन राखिसकेको छ, भने फोहर उठाउन तथा व्यवस्थापन गर्न सरसफाइ युवा स्वयंसेवक तयार पारेको छ ।

उद्घाटन कार्यक्रमको तयारीका लागि विभिन्न उपसमिति गठन गरी कार्य भइरहेको र सबै काम अन्तिमचरणमा पुगेको जिल्ला समन्वय समितिका प्रमुख पूर्णबहादुर रोकायाले बताए। वैशाख १ गते रारामा जिल्लामा रहेका चार स्थानीय तहले स्थानीय लोक झाँकी, देउडा, ढाल नाच, चुम्फा नाच, झोडा र बालो प्रदर्शन गर्ने कार्यक्रम छ ।

उक्त दिन पर्यटकलाई तालमा डुङ्गगामा घुमाउन डुङ्गा र ताल वरिपरी घुमाउन घोडाको व्यवस्था मिलाइएको छ । रारा आउने पर्यटकलाई सहजताका लागि सडक डिभिजन कार्यालय जुम्लाले मुगुको सिमाना बुलबुलेदेखि सल्लेरी र रारा विमानस्थलसम्म सडक बनाउन थालेको छ । हवाई यात्राका लागि नेपालगञ्ज र सुर्खेतबाट नियमित उडान गर्न सबै विमान कम्पनी सहमत भएका छन् ।

पर्यटन वर्षको उद्घाटनसँगै देशवासीको नाममा प्रधानमन्त्रीले सम्बोधन गर्ने भएकाले मुगु जिल्लावासीले प्रधानमन्त्रीको सम्बोधनमा मुगु नाग्चेलाग्ना तिब्बत् सडक, कणाली राजमार्ग, छायाँनाथ रारा पर्यटकीय पदमार्ग, रारा हिल्सा पदमार्ग, रारा सेफोक्सुण्डो पदमार्ग तथा रारा खप्तड पदमार्गबारे विषेश सम्बोधन हुने आशा गरेका छन् ।
रासस