१६ असार, काठमाडौं ।
१३ औं संस्करणको साफ च्याम्पियनसिप फुटबल एक वर्षका लागि सरेको छ । कोरोना भाइरस कोभिड १९ का कारण खेलकुदका अधिकांश प्रतियोगितामा असर पर्दा साफ च्याम्पियनसि पनि अर्को वर्ष मात्र आयोजना हुने भएको हो ।
सोमबार बसेको दक्षिण एसियाली फुटबल महासंघ (साफ) को बैठकले कोरोना भाइरस (कोभिड १९)का कारण साफ च्याम्पियनसिप एक वर्ष सार्ने निर्णय गरेको जनाएको छ । साफ च्याम्पियनसिप यो वर्ष हुने पर्ने थियो ।
दक्षिण एसियाली फुटबल महासंघ (साफ) ले सदस्य सात राष्ट्र नेपाल, भारत, पाकिस्तान, बंगलादेश, श्रीलंका, माल्दिभ्स र भुटानका फुटबल संघका महासचिवसँग सोमबार जुम मार्फत गरेको छलफलपछि प्रतियोगिता २०२१ का लागि सार्ने निर्णय गरेको हो ।
बैठकमा साफका जनरल सेक्रेटरी अन्वरुल हकको उपस्थिति रहेको थियो । यसै बैठकले साफ यू–१५ च्याम्पियनसिप, साफ यू–१५ साफ महिला च्याम्पियनशिप र साफ यू–१८ महिला च्याम्पियनसिप पनि स्थागित गर्ने निर्णय गरेको छ । उमेर समुहका प्रतियोगितामा भने थप छलफल हुने जनाईएको छ ।
यस अघि १३ औं संस्करणको साफ च्याम्पियनसिप सेप्टेम्बरमा बंगलादेशमा हुने तय भएको थियो । बंगलादेशले लगातार दोस्रो पटक साफ आयोजना गर्ने जिम्मेवारी पाएको थियो । सन् २०१८ को १२ औं साफ पनि बंगलादेशको ढाकामा भएको थियो । उक्त साफमा नेपाल सेमिफाइनलमा माल्दिभ्ससँग ३–० गोलले पराजित हुँदै प्रतियोगिताबाट बाहिरिएको थियो । माल्दिभ्सले नै त्यो संस्करण जितेको थियो ।
