योगेन्द्र योगी
२२ असार, दोहा ।
कुवेत सरकारबाट आममाफी पाएर आश्रय क्याम्पमा बसिका २ हजार ९ सय ८१ जना नेपाली स्वदेश फर्किसकेका छन् ।
आममाफी २ हजार ९ सय ९१ जना नेपाली सहभागी थिए । जसमध्ये १० जना महिला बाहेक २ हजार ९ सय ८१ जना नेपाली नागरिक नेपाल फर्किसकेको एनआरएनए मध्यपूर्व उपसंयोजक राजेन्द्र अर्यालले जानकारी दिएका छन् ।
आममाफीमा सहभागी बाँकी १० जना महिलाले विभिन्न बैंक तथा कम्पनीबाट ऋण लिएका र नतिरेको कारण मुद्दाहरु चलाईएकाहरु रहेको गैर आवासीय नेपाली संघ कुवेतका आइसिसी सदस्य अमित चाम्लिङले बताए ।
अब लिएका ऋण तिरेपछी वा सम्बन्धित निकायबाट मिनाह भएपछि मात्र बाँकी १० जनाको स्वदेश फर्किने बाटो खुल्ला हुने उपसंयोजक अर्यालले बताए ।
गत महिना जुन ११ देखि आममाफीमा सहभागी भएर सेल्टरमा रहेका नेपालीहरुको अल जजिरा एयरमार्फद उद्दार उडान सुरु भएको थियो कुवेत सरकारले गत अप्रिलको २५ देखि ३० तारिखसम्म संचालन गरेको आममाफिमा महिला र पुरूष गरि २ हजार ९ सय ९१ जना सहभागी भएका थिए ।
आममाफिमा सहभागी सबै नेपालीहरुलाई कुवेत सरकारले नि:शुल्क उद्दार गरेको हो । कुवेतमा करिब ७ हजार नेपाली कामदार अबैधानिक रुपमा बसेको तथ्यांक बाहिर आए पनि यस पटक २ हजार ९ सय ९१ जना मात्र आममाफीमा सहभागी भएका थिए ।
यस्तै कोरोना लगायत विभिन्न कारणले स्वदेश फर्किनै पर्ने नेपाली नागरिकहरुलाई नेपाल सरकारले तोकेको मापदण्ड अनुसार चार्टड उडानमार्फत स्वदेश फर्काउने कार्य भइहेको कुवेतस्थित नेपाली दूतावासले जनाएको छ ।
