३० असार, काठमाडौँ । विवाद समाधानका लागि भन्दै नेकपाका दुई अध्यक्षबीचको भेटवार्ता सकिएको छ । सहमतिको प्रयासका लागि भन्दै ६ दिनपछि मंलगलबार अध्यक्षद्वय केपी शर्मा ओली र पुष्पकमल दाहालबीच छलफल भएको थियो ।
मंगलबार छलफललाई निरन्तरता दिने सहमति दुई अध्यक्षबीच भएको छ । आज ओली र दाहालबीच करिब सवा घण्टा वार्ता भएको थियो ।
दाहालका प्रेस संयोजक विष्णु सापकोटाका अनुसार दुई अध्यक्षबीच बिहीबार फेरि छलफल हुने भएको छ ।
यसअघि आइतबार, सोमबार, मंगलबार र बुधबार ओली र दाहालबीच भेटवार्ता भएको थियो । तर, सहमति हुन नसकेपछि स्थायी कमिटी बैठक लगातार स्थगित हुँदै आएको छ ।
पछिल्लो पटक साउन २ गतेसम्मका लागि बैठक स्थगित भएको छ । बहुमत सदस्यले प्रधानमन्त्री र पार्टी अध्यक्ष दुवै पदबाट ओलीको राजीनामा मागेपछि नेकपाको शक्ति संघर्ष उत्कर्षमा छ ।
यही विवादले पार्टी फुटको नजिक पुग्न लागेपछि सहमतिको प्रयासका लागि भन्दै दुई अध्यक्षबीच छलफल हुँदै आएको हो । पछिल्लो पटक दुवै अध्यक्षले हतार नगरी सहमति जुटाउने सार्वजनिक अभिव्यक्ति दिएका छन् । तर, एक अर्काप्रतिका आशंका भने उस्तै छन् ।
