१३ साउन, गुल्मी । गुल्मीको चन्द्रकोट गाउँपालिकामा पहिरोले ६ घर परिवार विस्थापित भएका छन् ।
अबिरल वर्षासँगै गएको पहरोले गुल्मीमा ६ घर विस्थापित भएका छन् । सोमबार राति जिल्लाको चन्द्रकोट गाउँपालिका वडा नम्बर(८ बास्कोटमा सोमबार रातिदेखि परिरहेको वर्षाको कारण पहिरो जाँदा ६ घर परिवार विस्थापित भएका हुन् ।
केही गोठमा पनि पनि क्षति पुगेको र घर नै जोखिममा रहेको स्थानीय रुपेश नेपालीले जानकारी दिए । अबिरल वर्षाका जोखिममा परेका घर परिवारलाई तत्कालका लागि जनता बाल निकेतन मावि पिपलपाटामा बस्ने व्यवस्था मिलाउने काम भैरहेको छ ।
यसैविच, सोही गाउँपालिकामै एउटा ट्रक पहिरोमा पुरिएको छ । जिल्लाको चन्द्रकोट गाउँपालिकाको वडा नम्बर(७ खसिमारे भन्ने स्थानमा लु६ख ७७९२ नम्बरको ट्रक पहिरोले पुरिएको जिल्ला प्रहरी कार्यालय गुल्मीले जनाएको छ ।
बुटवलबाट सिमेन्ट, ग्यास, छड र फेन्सी सामानहरु लिएर शान्तिपुर जाँदै गरेको ट्रक बाटोमा हिलोमा अडकिएको बेला माथिबाट झरेको पहिरो खसेपछि झण्डै १ किलोमिटर तल झरेको प्रहरीले जनाएको छ । पहिरोले ट्रकमा राखिएका सामान र गाडीमा समेत क्षति भएको छ ।
सोमबार साँझ हिलो बाटोमा अड्किएको ट्रक डोजरले तान्दा टोचन चुँडिएपछि त्यत्तिकै छाडिएको थियो । गएराति करिब साढे बाह्र बजे पहिरोले सो ट्रकलाई पुरेको हो । पहिरोले ट्रक पुरे पनि मानवीय क्षति भने भएको छैन ।
