१४ साउन, काठमाडौँ ।
सत्तारुढ नेकपाको विवाद उत्कर्षमा पुगेकै बेला केन्द्रीय कमिटी बैठक माग गर्दै १५२ केन्द्रीय सदस्यले पार्टी कार्यालयमा लिखित पत्र दर्ता गरेका छन् । असार १० बाट सुरु भएको स्थायी कमिटी बैठक अनिर्णित भएको बेला बुधबार दिउँसो पार्टी कार्यालय धुम्बाराही पुगेर अध्यक्षद्वयलाई संवोधन गर्दै १५२ सदस्यको हस्ताक्षर बुझाएका हुन् ।
बैठक माग गर्दै हस्ताक्षर बुझाउने सदस्यहरु अध्यक्ष पुष्पकमल दाहाल र वरिष्ठ नेता माधवकुमार नेपाल समूहका छन् । पत्रमा भनिएको छ, ‘हाल देखिएको सबै विवाद र समस्याहरुको समाधान पार्टीको बैठकमा गहन छलफल गरी विधि पद्धति बमोजिम समाधान गर्नुपर्छ भन्ने हाम्रो ठहर छ ।’ उनीहरुले यसका लागि पार्टीको अन्तरिम विधान, २०७५ को धारा ५९(९क) ४ बमोजिम बैठक बोलाउनुपर्ने माग गरेका छन् ।
यो धाराअनुसार एक चौथाई सदस्यले बैठक माग गरेपछि १५ दिनभित्र बैठक बोलाउनुपर्छ । प्रधानमन्त्री र पार्टी अध्यक्ष दुवैबाट राजीनामाको माग भएपछि स्थायी कमिटी बैठक लगातार स्थगित हुँदै आएको छ । त्यहीबेला केन्द्रीय कमिटी बैठकको माग भएको हो ।
मंगलबारमात्रै प्रधानमन्त्री एवं अध्यक्ष ओलीले एकतर्फी रुपमा बैठक स्थगित गरेपछि दाहाल–नेपाल समूहका बहुमत स्थायी कमिटी सदस्यहरुको बैठक बसेको थियो । उक्त बैठकले ओलीले एकतर्फी बैठक स्थगित गर्नु अनुचित भएको ठहर गरेको थियो ।
