योगेन्द्र योगी
२९ साउन, दोहा ।
सयुक्त अरब इमिरेट्स (युएई) स्थित नेपाली दूतावासले आकर्षक तलब सुविधा लगायतका प्रलोभन देखाई विदेश ल्याएर ठग्ने र गलत सुचनामा परेर ठगीने क्रम बढेको भन्दै गम्भीर ध्यानाकर्षण भएको जनाएको छ । यस किसिमको ठगी धन्दामा सहभागी नहुन अनुरोध गर्दै दूतावासले यस्ता क्रियाकलापमा संलग्न जोहोहीलाई पनि प्रचलित कानुन बमोजिम कारबाही गरिने चेतावनी दिएको हो ।
हालै नेपालस्थित एक मेनपावर कम्पनीमा काम गर्ने व्यक्तिले बेलायत लैजाने प्रलोभनमा पारी जनही ९ लाख रूपैया लिई हाल यूएईमा रहेको एक व्यक्तिको जिम्मा लगाएको, तर यूएई आएपछि बेलायत पठाउन नसकिने भन्दै ठगी गरेको दूतावासले जनाएको छ । दुतावासका अनुसार त्यसपछि पीडित व्यक्तिलाई यूएईमै राम्रो रोजगारी लगाई दिने भन्दै पासपोर्ट र अन्य कागजात समेत मेनपावरले जफत गरेको थियो । उक्त रोजगारीको लागि तयार पारिएको अफर लेटर र भिसा नक्कली भएको जानकारी पाएपछि पीडितले नेपाल फर्कन आफ्नो पासपोर्ट माग्दो पासपोर्ट लिन बोलाई सांघातिक हमला गर्न लगाएको थियो ।
दुतावासका अनुसार पासपोर्ट नदिएको र आफू ठगीमा परेको बेहोरा सहितको निवेदन दूतावासलाई प्राप्त भएको छ । दुतावासले बैदेशिक रोजगारीमा आउँदा आधिकारिक निकायहरुबाट सत्यतथ्य बुझी प्रचलित कानुन बमोजिम नेपाल सरकारबाट श्रम स्वीकृति लिएर मात्रै आउन समेत अनुरोध गरेको छ ।
केही दिन अघि पिडितहरु मनोहर केसी र टिकाराम बोहोराले आफूहरुलगायत अन्य धेरैलाई बेलायत पठाईदिने भन्दै यूएई ल्याएर अलपत्र पारेको तथा न्याय माग्दा उल्टै दलालबाट कुटिएको भन्दै न्यायका लागि दूतावासमा निवेदन दिएका थिए । काठमाडाैँ स्थित तीनजुरे ईम्प्लोइमेन्ट सर्भिसेज प्रालीकी जनसंपर्क अधिकृत सिर्जना अधिकारी र दुबइ बस्ने श्याम थापामार्फत ६३ जना नेपालीहरुलाई बेलायत लैजाने भन्दै अहिले यूएई पुर्याएर अलपत्र पारेका छन् ।
