२९ साउन, सुर्खेत । सुर्खेतमा सुनका गहनासहित एक जना पक्राउ परेका छन् ।
जिल्ला प्रहरी कार्यालय सुर्खेतका अनुसार लुकाएर राखेको अवस्थामा सुनका गहनासहित एक जनालाई पक्राउ गरिएको छ ।
कार्यालयका डीएसपी रामप्रसाद घर्तीले बुधबार राति करिब १० बजेतिर वीरेन्द्रनगर नगरपालिका वडा नं ३ उत्तरगङ्गाको एक घरमा लुकाएर राखेको अवस्थामा सुनका गहना बरामत गरिएको जानकारी दिए ।
उनले १६ वटा चुरा, दुई वटा कडा, पाँच वटा झुम्का, चार वटा शिरफुल, तीन वटा क्लिप, एक वटा काँटा बरामत गरिएको बताए ।
उनले सुनका गहना बरामत गर्दा नजोखेर सिलबन्दी गरिएकाले कति सुन छ भनेर यकिन नभएको उल्लेख गरे । जनप्रतिनिधिको रोहबरमा गहना सिलबन्दी गरिएको उनको भनाइ छ ।
उनले सुन चोरेर ल्याएको हुन सक्ने अनुमान गरिएको बताउँदै पक्राउ परेका व्यक्ति सुन ल्याउनेभन्दा पनि सुन राख्ने भएको जानकारी दिए । सुन ल्याउने मुख्य व्यक्ति अर्कै हुन सक्ने भन्दै खोजी कार्य र अनुसन्धान जारी रहेको उनको भनाइ छ ।
