३२ साउन, जनकपुरधाम ।
धनुषा जिल्ला प्रशासन कार्यालयले आइतबार राति १२ बजेदेखि भदौ ७ गते राति १२ बजेसम्मका लागि जिल्लाभर निषेधाज्ञा जारी गरेको छ ।
निषेधाज्ञाको समयमा बिहान १० बजेसम्म पसल खोल्न दिइने धनुषाका प्रमुख जिल्ला अधिकारी प्रेमप्रसाद भट्टराईले जानकारी दिए । तर पसल खोल्दा, व्यवसाय सञ्चालन गर्दा मास्क, पञ्जा, सेनिटाइजर अनिवार्य रुपमा प्रयोग गर्न र समाजिक दूरीको पालना गर्नुपर्नेछ ।
स्थानीय प्रशासन ऐन २०२८ को दफा ६ को ३ बमोजिम जिल्लाभर निषेधाज्ञा लगाउने निर्णय भएको प्रमुख जिल्ला अधिकारी भट्टराईले जारी गरेको सूचनामा भनिएको छ ।
यसअघि प्रशासनले जनकपुरधाममा १९ साउनदेखि २५ साउनसम्म र दोस्रो पटक २६ साउनदेखि ३२ साउनसम्मका लागि निषेधाज्ञा जारी गर्ने आदेश भएको थियो । तर, भोलीदेखि जिल्लाभर निषेधाज्ञा विस्तार गरिएको हो ।
