३ भदौ, काठमाडौं ।
पर्सा क्षेत्र नम्बर ३ बाट निर्वाचित हरिनारायण प्रसाद रौनियारले आफ्नो सांसद पद निलम्बन बदर गर्न माग गर्दै संघीय संसद सचिवालयमा निवेदन दिएका छन् ।
रौनियारविरुद्ध अख्तियार दुरुपयोग अनुसन्धान आयोगले भ्रष्टाचार मुद्धा दायर गरेकाले उनी निलम्वनमा परेका थिए । निलम्बनमा परेपछि रौनियारले ०७५ पुस १५ मा निलम्बन गर्नुको कारण खुलाउन माग गर्दै संघीय संसद सचिवालयमा निवेदन दिएका थिए ।
तर, त्यसको कुनै जवाफ नआएको भन्दै उनले मंगलबार पुनः निवेदन दिएका हुन् । उनले आफ्नो सांसद पद निलम्बन बदर गरी यथा अवस्थामा कामकाज गर्ने आदेश माग गरेका छन् ।
रौनियारले अख्तियार दुरुपयोग अनुसन्धान आयोगले मुद्वा दर्ता गर्दैमा जननिर्वाचित प्रतिनिधि निलम्बन गर्ने प्रावधान प्रतिनिधिसभा संसद नियमावली समेतको विरुद्ध रहेको जिकिर गरेका छन् ।
अख्तियार दुरुपयोग अनुसन्धान आयोगसम्बन्धी ऐनमा भने सार्वजनिक पद धारण गरेको व्यक्तिलाई भ्रष्टाचार आरोपमा मुद्वा चलेको अवस्थामा किनारा नभएसम्म स्वतः निलम्बन हुने व्यवस्था छ ।
