१२ भदौ, विराटनगर ।
मोरङको बेलबारी नगरपालिका–५ कसेनीस्थित लोहन्द्र पुलमा ‘ग्याङ फाइट’ हुँदा एक जनाको मृत्यु भएको छ ।घटनामा अन्य चार जना घाइते भएका छन् ।
शुक्रबार दिउँसो १ बजेको समयमा सामान्य वादविवादमा खुकुरी र बन्चरोलगायतका हरियारसहितको झडपमा परेर ४० वर्षीय चन्द्रकुमार राईको मृत्यु भएको मोरङ प्रहरीका प्रवक्ता डीएसपी मानबहादुर राईले बताए।
राईका अनुसार स्थानीय ३२ वर्षीय जितेन चौधरी, २५ वर्षीय दिनेश श्रेष्ठ, ३२ वर्षीय सन्तोष मगर र विक्रम राईको समूह र ४० वर्षीय चन्द्रकुमार राई, ४२ वर्षीय सईकुमार राई, ३२ को समुन्द्र राई र १६ का गौरव राईको समूहबीच वादविवाद भई सुरुमा चाैधरीको समूहले खुकुरी र बन्चरो लगायतका हतियारले प्रहार गरेपछि दोहोरो झडप भएको थियो ।
मादकपदार्थ सेवन गरेकादुई पक्षबीच बिहीबार बेलुकैदेखि सामान्य विवाद रहेको र त्यही विवाद शुक्रबार दिउँसो १ बजे झडपमा परिणत भएको डीएसपी राईले बताए । झडप गर्ने दुवै पक्ष एक आपसका छिमेकी रहेका छन् । घटनामा घाइते भएका राईको उपचारका क्रममा मोरङको बूढीगंगास्थित विराट शिक्षण अस्पतालमा दिउँसो ३ बजे मृत्यु भएको छ भने सईकुमार, समुन्द्र र गौरव गम्भीर घाइते भएका छन् । अर्का समूहका पनि चौधरी घाइते भएका छन । उनीहरुको सोही अस्पतालमा उपचार भईरहेको प्रहरीले जनाएको छ ।
घटनामा संलग्न दिनेश श्रेष्ठ, सन्तोष मगर र विक्रम राई फरार रहेकाले खोजी भइरहेको डीएसपी राईल बताए । उनीहरुबीचमा बिहीबार के विषयमा विवाद भएको थियो भन्ने खुल्न बाँकी रहेको राईले बताए ।
