विराटनगर ,बैशाख १९ ः सरकारी स्वामित्वमा रहेका राष्ट्रिय वाणिज्य बैंक र एनआईडीसी डेभलपमेन्ट बैंक गाभिएका छन् ।
बुधबार आयोजित कार्यक्रममा अर्थमन्त्री डा. युवारज खतिवडाले दुई बैंकको एकीकृत कारोबारको सुभारम्भ गरेका हुन् । दुई बैंक गाभिएपछि भने राष्ट्रिय वाणिज्य बैंकको नाममा कारोबार हुनेछ ।
गाभिएपछि बैंकको १९१ शाखा कार्यालय, चुक्ता पूँजी ९ अर्ब ४७ लाख रुपैयाँ, जगेडा तथा कोषहरु ८ अर्ब ३० करोड ५६ लाख र कुल सम्पत्ति १ खर्ब ८२ अर्ब ८५ करोड ५७ लाख रुपैयाँ पुगेको छ ।
त्यस्तै बैंकको कुल निक्षेप १ खर्ब ५४ अर्ब १७ करोड ६३ लाख, कर्जा तथा सापट १ खर्ब, १५ अर्ब ७३ करोड ९ लाख ८७ हजार र खुद नाफा ३ अर्ब १२ करोड ६४ लाख रुपैयाँ भएको छ ।
एकीकृत कारोबारको शुभारम्भ गर्दै अर्थमन्त्री खतिवडाले दुई सरकारी बैंक गाभिएपछि वित्तीय रुपमा थप बलियो र प्रतिस्पर्धी हुनुपर्ने बताए । वित्तीय प्रणालीमा हुने अपराध असहृय हुने र गलत कार्य गरेमा सरकारले कसैलाई नछोड्ने उनको धारण थियो ।
नेपाल राष्ट्र बैंकका डेपुटी गभर्नर चिन्तामणि शिवाकोटीले सरकारी बैंक भएकोले राष्ट्रिय वाणिज्य बैंकले अगुवा बैंकको रुपमा कार्य गर्नुपर्ने बताए ।
बैंकका प्रमुख कार्यकारी अधिकृत किरण कुमार श्रेष्ठले दुई बैंक गाभिएपछि बैंक तथा वित्तीय संस्थाको संख्यामा कमी आई गुणात्मक वृद्धि हुने, बैंकको पूँजीकोष बृद्धि भई देशको वित्तीय क्षेत्र तथा समग्र अर्थतन्त्रलाई थप सकारात्मक योगदान दिन सक्ने बताए ।
२०१६ साल असार १ गते देशको औद्योगिक विकासमा योगदान र्पुयाउने उद्देश्य राखि सरकारले विशेष ऐन अन्तर्गत नेपाल औद्योगिक विकास निगम अर्थात हालको एनआईडीसी. डेभलपमेण्ट बैक स्थापना गरेको थियो ।
त्यस्तै २०२२ साल माघ १० गते राष्ट्रिय वाणिज्य बैंक ऐन, २०२१ अन्तर्गत वाणिज्य बैंक स्थापना गरिएको थियो ।सरकारले २०७३ माघ १४ गते यी दुई सरकारी वित्तीय संस्थालाई आपासमा गाभ्ने निर्णय गरेको थियो ।
