आजबाट सहुलियत पसल खुल्दै, अनलाइनबाट पनि किन्न सकिने

0SHARES

१५ आश्विन २०७७ नेपाल टाईम्स

१५ आश्विन, काठमाडौँ ।
चाडपर्वलाई लक्षित गर्दै अनलाइन अर्डरमार्फत पनि सामान किन्न सकिने गरी सरकारले आजबाट सुपथ मूल्य पसल सन्चालन गरेको छ ।

खाद्य वस्तु बिक्री गर्न सहुलियत पसल सञ्चालन गर्ने उद्योग वाणिज्य तथा आपूर्ति मन्त्रालयको परम्परालाई निरन्तरता दिँदै छठको भोलिपल्टसम्म यस्ता पसल सञ्चालन गर्न लागेको हो । उपत्यका र बाहिर गरी ६५ भन्दा बढी सरकारी आउटलेट–बिक्री केन्द्रबाट छुट दिइने मन्त्रालयकी सहायक प्रवक्ता उर्मिला केसीले जानकारी दिइन् ।

‘उपत्यकामा साल्ट ट्रेडिङ कर्पोरेसनका ११ र खाद्य व्यवस्था तथा व्यापार कम्पनीका ५ आउटलेट–बिक्री केन्द्र छन् । जिल्लामा खाद्यका २५ र साल्टका २४ वटा आउटलेट छन्,’ उनले भनिन्, ‘तिनबाट खाद्यवस्तुमा छुट दिइनेछ ।’

उपत्यकाका कालीमाटी, कोटेश्वर, टेकु, सिंहदरबार, सतुंगल, ललितपुर, थापाथाली, नख्खु, प्रयागपोखरी, जावलाखेल र भक्तपुरमा यस्ता पसल सञ्चालन हुनेछन् । खाद्य र साल्टसँगै दुग्ध विकास संस्थान (डीडीसी) ले पनि आफ्ना बिक्री केन्द्रबाट छुट दिने उनले बताइन् ।

डीडीसीले लैनचौर, न्युरोड र खुमलटारबाट छुट दिनेछ । आउटलेटबाट नुन, चिनी, घिउ, चामल, दाल, फापर, केराउ, सिमी र खसीबोकामा छुट दिइनेछ । विगतमा यी तीन संस्थानसँगै निजी क्षेत्रले पनि रामशाह पथमा एकीकृत सहुलियत पसल सञ्चालन गर्दै आएको थियो ।

यस वर्ष कोरोनाका कारण बढी भीड हुने आकलनले एकीकृत सहुलियत पसल नराखिने भएको हो । आउटलेटमा यी निकायले बिक्री गर्ने सबै वस्तु पाइने मन्त्रालयले जनाएको छ । ‘साल्ट र खाद्यका आफ्नै बिक्री केन्द्र–स्टल छन्, त्यहाँ छुट पाइन्छ,’ केसीले भनिन् ।

सबैले आआफ्नो स्टलबाट छुट दिने निर्णय भएको खाद्य व्यवस्था तथा व्यापार कम्पनीकी सूचना अधिकारी शर्मिला न्यौपानेले जानकारी दिइन् । ‘आआफ्नो स्टलमा छुट दिँदा भीड कम हुन्छ,’ उनले भनिन्, ‘त्यही भएर यसपालि एकीकृत सहुलियत पसल खोलिएन ।’

ताप्लेजुङदेखि सुदूरपश्चिमसम्म खाद्यका डिपो छन् । तिनबाट पनि छुट दिइने उनले बताइन् । अनलाइन सेवा पनि यथावत् रहने न्यौपानेको भनाइ छ । डीडीसीका योजना तथा बजार व्यवस्थापन विभाग प्रमुख सञ्जीव झाले पनि यसपालि एकीकृत पसल सञ्चालन नगरिने जानकारी दिए ।

‘सहुलियत पसल सञ्चालन नगरे पनि खाद्य र साल्टका आउटलेटमा घिउ उपलब्ध गराउँछौं,’ उनले भने । मन्त्रालयका अनुसार आउटलेटसँगै घुम्ती सेवा पसल पनि सञ्चालन गरिनेछ । घुम्ती सेवा विशेषगरी साल्ट ट्रेडिङले सञ्चालन गर्दै आएको छ ।

सरकारले प्रतिकिलो ७० रुपैयाँमा चिनी बिक्री गर्ने निर्णय गरेको छ । हाल साल्टको चिनीको मूल्य ७३ रुपैयाँ छ । निजी क्षेत्रले आयात र उत्पादन गरेको चिनीको खुद्रा मूल्य ८५ रुपैयाँसम्म पर्छ । साल्टबाट बिक्री गर्ने उक्त चिनी गत वर्षको तुलनामा सस्तोमा बिक्री गर्न लागिएको आपूर्ति मन्त्रालयकी सहायक प्रवक्ता केसीले जानकारी दिइन् ।

सस्तो चिनी खरिदमा भने सीमा तोकिएको छ । प्रतिपरिवार ४ किलो मात्रै खरिद गर्न सक्ने व्यवस्था मिलाइएको छ । ‘सहुलियत चिनी ८ सय टन मात्रै मौज्दात छ । त्यही भएर खरिदमा सीमा तोकेका छौं,’ उनले भनिन्, ‘थप २० हजार टन आउने क्रममा छ । अभाव हुँदैन ।’

खाद्यले बिक्री गर्ने चामलमा प्रतिकिलो ५ रुपैयाँ छुट हुनेछ । दसैंलाई लक्ष्य गरी बिक्री गरिने खसी, बोका, च्यांग्रामा प्रतिकिलो १० रुपैयाँ छुट दिइनेछ । खसीबोका र च्यांग्रा भने घटस्थापनाको एक–दुई अगाडिबाट मात्रै बिक्री गरिने खाद्य व्यवस्था तथा व्यापार कम्पनीकी सूचना अधिकारी न्यौपानेले जानकारी दिइन् ।

खसीबोका हेटौंडा, दाङ र च्यांग्रा मुस्ताङबाट खरिद गरी बिक्री गरिने जनाइएको छ । ‘तत्काललाई एक हजार खसी र एक हजार च्यांग्रा किन्ने योजना छ,’ उनले भनिन्, ‘माग बढे थप भित्र्याउँछौं ।’ खाद्यले १० रुपैयाँ छुट दिने बताए पनि किलोको मूल्य भने निर्धारण गरेको छैन ।

विज्ञापन बक्स