‘एन्टिभाइरल थेरापी’ जसले बचाउन सक्छ संक्रमितको ज्यान

897SHARES

५ जेष्ठ, एजेन्सी ।
अस्ट्रेलिया तथा अमेरिकाका संयुक्त अनुसन्धानकर्ताको एक टोलीले ‘एन्टिभाइरल थेरापी’को विकास गरेका छन् ।

जसले सङ्क्रमित मुसामा रहेको ९९.९ प्रतिशत कोरोना भाइरसलाई मारेको छ। अस्ट्रेलियाको क्वीन्सल्याण्डस्थित ग्रिफिथ युनिभरसिटीका प्रमुख अनुसन्धानकर्ता प्राध्यापक नाइजेल म्याकमिलनले यो पद्दतिलाई ‘सिक एण्ड डेस्ट्रोय मिसन’ का रूपमा व्याख्या गरे जहाँ थेरापीले अनुवांशिक रूपमै कोरोना भाइरसलाई लक्षित गर्दछ।

ग्रिफिथ युनिभरसिटीको ‘मेन्जिज हेल्थ इन्सिटच्युट’ र अमेरिकाको क्यान्सर, डाइबिटिज र अन्य प्राणघातक रोगहरूको अनुसन्धान गर्ने संस्था ‘सिटी अफ होप’ का संयुक्त अन्तर्राष्ट्रिय सोधकर्ताहरूको टोलीले गत वर्षको अप्रिलदेखि सो अनुसन्धानको थालनी गरेका थिए।

‘मलिकुलर थेरापी’ नामक जर्नलमा प्रकाशित सो अनुसन्धानले ‘जिन साइलेन्सिङ आरएनए टेक्नोलोजी’को प्रयोग गर्दै भाइरस जिनोमलाई सिधै आक्रमण गर्ने विधि प्रयोग गरेको छ।

‘यसले जिनोमलाई तहसनस पारिदिन्छ र त्यसपछि भाइरस फेरि फैलिन पाउँदैन । त्यसैले हामीले नानोपार्टिकल इन्जेक्ट गर्छौं र त्यसले ‘हिट सिकिङ मिसाइल’लेजस्तै भाइरसलाई खोज्दै मार्ने काम गर्छ’, प्राध्यापक म्याकमिलनले भने ‘यसलाई पहिलोपटक हामीले पार्टिकलका रूपमा प्याकेज गरेर रगतका माध्यमद्वारा पठाएर भाइरसलाई आक्रमण गर्न सफल भएका छौँ।’

यो विधिले जीवन बचाउन सक्छ
प्राध्यापक म्याकमिलनले यो थेरापी कोरोना निको पार्ने उपचार पद्दति नभए पनि यसले फोक्सोमा भाइरसको सङ्ख्या ९९.९ प्रतिशतले कम गराउने हुनाले यो उपचारजत्तिकै उपयोगी भएको कुरा उल्लेख गरे।

‘यो थेरापी आइसियुमा भएका बिरामीहरूका लागि लाभदायक हुन सक्छ जहाँ खोप लगाउन ढिला भइसकेको हुन्छ’, उनले भने ।

प्राध्यापक म्याकमिलनले जानामिभिर र रेमडेसिभिरजस्ता परम्परागत एन्टिभाइरलले लक्षणहरूको कमी गर्नुका साथै छिटो निको पार्न मद्दत गर्ने बताउँदै अमेरिकी प्रमुख स्वास्थ्य सल्लाहकार एनथोनी फाउचीले कोरोना भाइरसविरुद्ध खोपहरू विकास भए पनि हालसम्म सिधा चिकित्सकीय विधि वा उपचार नभएको बताएको पनि जिकिर गरे।

‘यो इन्जेक्सनको रूपमा प्रत्येक दिन आइसियुमा रहेका बिरामीलाई चार वा पाँच दिनसम्म लगातार दिन वा भर्खरै सङ्क्रमित भएकालाई एउटै इन्जेक्सनका रूपमा दिन सकिन्छ’, प्राध्यापक म्याकमिलनले भने।

साथै उनले यो उपचारविधि आगामी चरणको क्लिनिकल परीक्षणको नतिजाका आधारमा सन् २०२३ सम्म उपलब्ध हुन सक्ने कुरा पनि बताए।

सिटी अफ होप र ग्रिफिथ विश्वविद्यालयका सहअनुसन्धानकर्ता प्राध्यापक केभिन मोरिसले यो पद्दतिले सार्स भाइरसहरू सार्स–कोभ–१ र सार्स–कोभ–२ लाई लक्षित गर्ने र भाइरसको जिनोममा संरक्षित राख्ने हुँदा भविष्यका भेरिएन्टलाई पनि लक्षित गर्न सक्ने बताए।

‘यो नानोपार्टिकलहरू ४ डिग्री सेल्सियसको तापक्रममा १२ महिनासम्म र सामान्य ‘रुम’ तापक्रममा एक महिनाभन्दा बढी स्थिर देखिएको छ’, प्राध्यापक म्याकमिलनले भने ।

‘यी नानोपार्टिकलहरू कम पैसामा नै ठूलो मात्रामा उत्पादन गर्न सकिनेछ’, प्राध्यापक मोरिसले भने।

छुटाउनुभयो कि?

सम्पूर्ण