एमाले संसदीय दल र केन्द्रीय कमिटी बैठक आज बस्दै, खनाल र नेपाल समूह नजाने

441SHARES

७ चैत, काठमाडौँ । नेकपा एमालेका वरिष्ठ नेताहरु झलनाथ खनाल र माधव नेपाल समूहले पार्टी अध्यक्ष तथा प्रधानमन्त्री केपी शर्मा ओलीले शनिबारका लागि आह्वान गरेको संसदीय दल र केन्द्रीय कमिटी बैठकमा सहभागी नहुने निर्णय गरेको छ ।

शुक्रबार बानेश्वरमा बसेको बैठकले खनाल–नेपाल समूहका स्थायी कमिटी सदस्यहरूको बालुवाटारमा बैठक राखेर दललाई निजीकरण गर्न खोजिएको र २८ फागुनको निर्णय खारेज नभएसम्म आजका लागि बोलाइएको केन्द्रीय कमिटी बैठकमा पनि सहभागी नहुने जनाएको हो ।

’विगतमा संसदीय दलको बैठक दलको कार्यालय, सिंहदरबार वा संसद् भवन, बानेश्वरमा बस्दै आएकोमा यसपटक प्रधानमन्त्रीको निवासमा राखेर दललाई निजीकरण गर्न खोजिएकाले त्यसमा सहभागी नहुने । बैठक दलको कार्यालय वा संसद् भवनमा आयोजना गरी उपयुक्त एजेन्डा र प्रक्रिया अवलम्बन गरिएमा विचार गर्ने,’ खनाल–नेपाल समूहको विज्ञप्तिमा उल्लेख गरिएको छ ।

त्यस्तै केन्द्रीय कमिटी बैठकका नाममा आफ्ना गुटका मानिसलाई मात्र खबर गरी फागुन २८ गते अवैध ढंगले भेला गरी विधान उल्लंघन गरिएकाले उक्त बैठक खारेज नभएसम्म केन्द्रीय कमिटीको बैठक बस्न नसक्ने भन्दै आजका लागि बोलाइएको बैठकमा सहभागी नहुने खनाल–नेपाल समूहले जनाएको छ ।

सर्वोच्च अदालतको फैसलाले एकतापछिको नेकपा अवैध ठह¥याउँदै एमाले र माओवादी केन्द्र ब्युँतिएको थियो । त्यसपछि प्रधानमन्त्री समेत रहेका एमाले अध्यक्ष ओलीले २८ फागुनमा आफू पक्षीय केन्द्रीय कमिटी बैठक राखेर पार्टीमा व्यापक फेरबदल गरेका थिए । पार्टी महाधिवेशन तोक्दै माओवादी केन्द्रबाट प्रवेश गरेका २३ जनालाई केन्द्रीय समिटीमा मनोनित गरेका थिए भने खनाल–नेपाल समूहका नेताहरुको जिम्मेवारी खोसेका थिए । त्यसपछि असन्तुष्ट बनेका खनाल–नेपाल समूहले ललितपुरमा चैत ४ र ५ गते राष्ट्रिय भेला गरेका थिए । भेलाले एमालेलाई एकताबद्ध पार्ने र देशभर संगठात्मक अभियान चलाउनेलगायतका निर्णय गरेको थियो । खनाल–नेपाल समूहले माओवादी केन्द्रसँगको एकता पूर्वको अवस्थाबाट पार्टीलाई अगाडि बढाउनु पर्ने माग गरेको छ ।

छुटाउनुभयो कि?

सम्पूर्ण