चितवन, माघ १६
चितवन राष्ट्रिय निकुञ्ज भित्रने पर्यटकको संख्यामा यसवर्ष आशातित् वृद्धि नभएको तथ्यांकले देखाएको छ । चालू आर्थिक वर्षको छ महिनामा गत आर्थिक वर्षको छ महिनामा भन्दा न्यून संख्याले मात्रै पर्यटक वृद्धि भएको पाइएको हो ।
निकुञ्जले उपलब्ध गराएको तथ्यांकअनुसार चालु आवको छ महिनामा विदेशी ४६ हजार ७ सय ८९, सार्क मुलुकका सात हजार ४४ र नेपाली १३ हजार २९० गरी ६७ हजार १२३ पर्यटक निकुञ्ज प्रवेश गरेका छन् ।
गत आवको सोही अवधिमा ६३ हजार ८सय ५ पर्यटक निकुञ्ज प्रवेश गरेका थिए । गत आर्थिक वर्षको छ महिनामा भन्दा चालू आवको सोही अवधिमा तीन हजार ३१८ पर्यटकमात्र वृद्धि भएका छन ।
चालु आवमा विदेशी ८७ हजार १९०, सार्कका १५ हजार ८७९ र नेपाली ३६ हजार ५६ गरी एक लाख ३९ हजार १२५ पर्यटकले निकुञ्ज घुमेको तथ्यांकले देखाएको छ । निकुञ्जका सूचना अधिकारी नुरेन्द्र अर्यालले बाढीका कारण आशातीत पर्यटक निकुञ्ज नभित्रिएको बताए । निकुञ्जमा चालू आवमा एक लाख ५० हजार पर्यटक भित्रिने अपेक्षा गरिएको अर्यालले बताए ।
