१६ चैत, जुम्ला । जुम्लामा टाइफाइड रोग विरुद्धको खोप अभियान शुरु हुँदै छ । आगामी चैत २५ देखि २०७९ को बैशाख ७ गते सम्म जुम्लामा टाइफाइड विरुद्धको खोप अभियान सञ्चालन गरिने भएको छ ।
जिल्ला जनस्वास्थ्य कार्यालय जुम्लाका प्रमुख कृष्ण सापकोटाका अनुसार जुम्लाका सबै पालिकाका १५ महिनादेखि माथि र १५ वर्ष मुनिका ४२ हजार ४ सय २० जना बालबालिकालाई टाइफाइड विरुद्धको टीसिभी खोप लगाइने छ ।
उनका अनुसार खोपबाट बचाउन सकिने रोगहरुलाई शून्यमा झार्ने नेपाल सरकारको लक्ष्य अनुसार जुम्लामा बढ्दो टाइफाइड रोग विरुद्ध खोप अभियान सञ्चालन गर्न थालिएको हो ।
पूर्ण खोपको सुनिश्चतता गर्न तथा खोप कभरेज ९५ प्रतिशत पुर्याउन जिल्लामा अभियानकै रुपमा खोप दिन थालिएको छ ।
जनस्वास्थ्य कार्यालयका अनुसार खोपबाट कोही बालबालिका नछुट्ने गरी गाउँ तथा विद्यालयमा १ सय ९१ जनाको खोप टोली परिचालन गरिने भएको छ ।
जुम्ला प्रदेश ‘ख’मा चैत २५ देखि ३० र प्रदेश ‘क’मा २०७९ बैशाख २ देखि ७ गते सम्म दुई चरणमा खोप अभियान सञ्चालन गरिने छ ।
