प्रदेशको नाम र स्थायी राजधानी छिट्टै : मन्त्री कार्की

0SHARES

१८ आश्विन २०७५ नेपाल टाईम्स

विराटनगर, असोज १८
१ नम्बर प्रदेशका आन्तरिक मामिला तथा कानूनमन्त्री हिक्मत कार्कीले प्रदेशको नाम र स्थायी राजधानीको छिट्टै टुंग्याउने सरकारले तयारी गरेको बताएका छन् ।

प्रदेशसभाको बिहीबार बसेको बैठकमा सांसदहरुले उठाएको प्रश्नको जवाफ दिँदै मन्त्री कार्कीले नेकपाको दुई तिहाइ मत भएपनि प्रतिपक्षी दल कांग्रेससहितको सहमतिमा उक्त निर्णय लिइने बताएका छन् । उनले संसदको दुई तिहाइ मतले अन्तिम निर्णय लिने जानकारी गराउँदै सरकारले सहजीकरणमात्रै गरेको बताए ।

मन्त्री कार्कीले प्रदेशको नामाकरण र राजधानी तोक्ने कुरामा सबै राजनीतिक दलको सहयोगको अपिल पनि गरे । संसदको शून्य समयमा बोल्दै संघीय समाजवादी फोरम नेपाल संसदीय दलका नेता जयराम यादवले राजधानी विराटनगरको विकल्प खोज्नु नहुनेमा जोड दिए । उनले नेपालको सीमा क्षेत्रभित्रको जहाँसुकैको भूगोलमा पनि यथेष्ट सुरक्षा रहेको बताउँदै विराटनगर असुरक्षित रहने कुरा गलत भएको बताए ।

यादवले पहिचानलाई आधार मानेर नामाकरण गर्नुपर्ने पनि बताए । यस्तै सांसद आशारत्न जबेगुले सरकारका मुख्य अंगहरु विकेन्द्रीकरण गर्न नहुने बताउँदै नामाकरण पहिचानका आधारमा हुनुपर्ने बताईन् ।

संसदको बिहिबार बसेको बैठकले प्रदेशसभा सचिवालय सम्बन्धमा व्यवस्था गर्न बनेको विधेयकलाई दफावार छलफलका लागि न्याय प्रशासन तथा विधायन समितिमा पठाउने निर्णय गरेको छ । उक्त विधेयक माथि ९ जना सांसदहरुले संशोधन दर्ता गराएका थिए । प्रदेशसभाको अर्को बैठक असोज २१ गते बस्नेछ ।

विज्ञापन बक्स