प्रदेश १ का तीन जिल्लामा होटल र अस्पतालमा आइसोलेसन राख्ने निर्णय

0SHARES

२५ श्रावण २०७७ नेपाल टाईम्स

२५ साउन, विराटनगर ।
प्रदेश १ सरकारले कोरोना भाइरस (कोभिड-१९) प्रभावित तीन जिल्लाका होटेल र  निजी अस्पतालमा आइसोलेसन केन्द्र सञ्चालन निर्णय गर्ने छ । आईतबार बसेको प्रदेश स्तरीय कोरोना क्राइसिस मेनेजमेन्ट कमिटी (सिसिएमसी)को बैठकले झापा, मोरङ्ग र सुनसरी जिल्लामा प्रत्येक जिल्लामा एक/एक वटा निजी होटल र निजी अस्पतालमा आइसोलेसन केन्द्र स्थापना गर्ने निर्णय  गरेको हो ।

बैठकले स्थानीय तहसमेतको साझेदारी र सहकार्यमा कोभिड– १९ को संक्रमित लक्षण विहिन व्यक्तिहरु राख्नका लागि विराटनगर महानगरपालिकास्थित मारवाडी सेवा समाजमा ५० बेड , रंगेली नगरपालिकास्थित वडा नं. ७ स्थित श्रीजनता क्याम्पसको भवनमा १०० बेड, सुनसरीको हरिनगर गाउँपालिका–१ स्थित वि. जेनेरल अस्पतालमा ५० बेड र बराहक्षेत्र नगरपालिका स्थित कृष्णदास आश्रम चतरामा १०० बेडको आइसोलेसन केन्द्र स्थापना गर्ने निर्णय समेत गरेको मुख्यमन्त्रीका प्रेस सल्लाहकार ध्रुव सुवेदीले जानकारी दिए ।

त्यस्तै बैठकले आन्तरिक मामिला तथा कानून मन्त्रालयले तयार गरेको “लकडाउन खुले पश्चात कोभिड–१९ रोकथाम, प्रतिकार्य र नियन्त्रण सम्बन्धी कार्ययोजना, २०७७” स्वीकृत गरेको छ ।

त्यस्तै आइसोलेसन स्थापना गर्ने तथा पिसिआर परीक्षणको दायरालाई थप फराकिलो र व्यवस्थित गर्ने निर्णय पनि बैठकले गरेको छ । शैक्षिक संस्थाहरुमा स्थापना गरिएका क्वारेन्टाइन साउन मसान्तसम्म पूर्णरुपले हटाउने निर्णय पनि भएको छ । बेठकले नेपाल भारत सीमालाई थप कडाई गर्ने र आवतजावत नियन्त्रण गर्ने निर्णय पनि गरेको कार्कीले जानकारी दिए ।

बैठकले कोरोना रोकथाम तथा नियन्त्रणका लागि सटडाउन, लकडाउन, कफ्र्यु आदि लगाउनु पर्ने अवस्थामा पनि सेवा प्रवाह, बन्द व्यापार, यातायात सञ्चालन, प्रयोगशाला सञ्चालन, उद्योग आदि सञ्चालन सम्वन्धी व्यवस्थित नीति तर्जुमा गर्ने निर्णय गरेको छ ।

यसैगरी किसानहरुलाई मल, बीउ, कृषि उपज, औषधि आदिको प्रभावकारी वितरण र अन्य व्यवस्थापनका लागि प्रदेश सरकारका प्रमुख सचिवलाई जिम्मा दिने भएको छ ।

विज्ञापन बक्स