प्रदेश १ को नाम र राजधानी बैशाखमा

0SHARES

२५ चैत्र २०७५ नेपाल टाईम्स

विराटनगर, चैत २५
प्रदेश नम्बर १ का मुख्यमन्त्री शेरधन राईले प्रदेशको स्थायी राजधानी र नाम बैशाखको पहिलो हप्तामा टुंगो लाग्ने बताएका छन् । केहि दिनभित्र प्रदेश सभामा यस विषयले प्रवेश पाई सहमतिको आधारमा स्थायी राजधानी र नामाकारण सार्वजनिक गरिने उनले प्रष्ट पारे ।

विराटनगरमा सोमबार आयोजित कृष्णप्रसाद सिग्देल युवा पत्रकारिता पुरस्कार वितरण समारोहमा मुख्यमन्त्री राईले सञ्चारकर्मी प्रति सरकार संवेदनशील रहेको पनि बताए । उनले पत्रकारको दक्षता वृद्धिका लागि प्रदेश सरकारले आगामी वर्षको वजेटमा सञ्चार प्रशिक्षण प्रतिष्ठान स्थापना गर्ने बताए ।

उनले आगामी वैशाख २४ गते राष्ट्रिय पत्रकार दिवसमा प्रदेश सरकारले विशेष समारोहको आयोजना गरी अग्रज पत्रकारलाई सम्मान गर्न कार्यदल गठनको प्रक्रिया सुरु गरेको पनि जानकारी दिए ।

 

यसैबीच विराटनगरका ब्यवसायी स्व.कृष्णप्रसाद सिग्देलको स्मृतिमा प्रेस चौतारी नेपाल मोरङले स्थापना गरेको पुरस्कार पत्रकार सुमन सुस्केरालाई प्रदान गरिएको छ ।मुख्यमन्त्री राईले पत्रकार सुस्केरालाई नगद रु ११ हजार १ सय ११ रुपैया र प्रमाणपत्रसहित सम्मान गरेका हुन् ।

कृष्णप्रसाद सिग्देल युवा पत्रकारिता पुरस्कारका लागि सिग्देल परिवारले १ लाखको अक्षयकोष स्थापना गरेको छ । कार्यक्रममा बोल्दै नेपाल कम्यूनिष्ट पार्टीका केन्द्रीय सदस्य विनोद ढकालले स्थापित पुरस्कारले पत्रकारिता क्षेत्रको विकासमा ठूलो योगदान पु¥याएको धारणा व्यक्त गरे ।

नेपाल पत्रकार महासंघ प्रदेश अध्यक्ष विक्रम लुईटेलले प्रदेश सरकारले पत्रपत्रिका, रेडियो, टिभिलाई विशेष अनुदानको व्यवस्था गर्नुपर्नेमा जोड दिदै पत्रकारलाई न्यूनतम पारिश्रमिक भुक्तानीको वातावरण सिर्जना गर्न आग्रह गरे ।

विज्ञापन बक्स