८ असोज, काठमाडौं ।
नेपाली कांग्रेसले सरकारले संवैधानिक परिषदको गरिमालाई अवमूल्यन गरेको भन्दै आपत्ति जनाएको छ। कांग्रेसका प्रवक्ता विश्वप्रकाश शर्माले बिहीबार एक विज्ञप्ति जारी गर्दै प्रधानमन्त्री केपी ओलीलाई संवैधानिक परिषद् नेपाल कम्युनिस्ट पार्टी (नेकपा) सचिवालय नभएकाले यसको अवमूल्यन नगर्न सजग गराएका हुन् ।
शर्माले लोकतान्त्रिक राज्य व्यवस्थामा संवैधानिक परिषद्को महत्व, मर्म एवं मूल्यलाई सरकारले नबुझ्नु दुःखद् भएको भन्दै लोकतान्त्रिक पद्धतिका लागि यो सुखद् संकेत नभएको प्रष्ट पारेका हुन्।
सरकारले अध्यादेश मार्फत संवैधानिक परिषदकै औचित्य समाप्त पार्ने असफल षड्यन्त्र गरेको कांग्रेसको आरोप छ। सत्तारुढ नेकपा सचिवालय बैठकमा संवैधानिक नियुक्तिको विषयमा छलफल गरेको भन्दै विज्ञप्तिमा कांग्रेसले आपत्ति जनाएको छ।
‘नेकपा सचिवालयको पछिल्लो बैठकले संवैधानिक नियुक्ति गर्ने विषयमा जुन रूपमा आफूलाई संलग्न गरायो त्यसबाट यसको बचेको गरिमालाई अन्त्य गर्ने दिशामा सरकार उद्दत रहेको पुष्टि भएको छ’, प्रवक्ता शर्माले सार्वजनिक गरेको विज्ञप्तिमा भनिएको छ, ‘संवैधानिक परिषद एवम् संवैधानिक नियुक्तिका सम्बन्धमा संविधानले व्यवस्था गरेको प्रबन्ध र पद्धति भन्दा बाहिर गएर कार्य नगर्न नेपाली कांग्रेस सम्माननीय प्रधानमन्त्रीलाई सजग गराउँदै सार्वजनिक रुपले अपील गर्दछ।’
