बर्दिबास प्रदर्शनमा मृत्यु भएको विषयमा छानबिन समिति गठन

0SHARES

१२ मंसिर २०७७ नेपाल टाईम्स

१२ मंसिर, काठमाडौं।

गृह मन्त्रालयले महोत्तरीकाे बर्दिबासमा बालिकाको हत्यापछि गएको मंगलबार प्रदर्शनका क्रममा भएको मृत्युको विषयमा छानबिन गर्न समिति गठन गरेको छ । सोही घटना सम्बन्धमा मन्त्रालयले बिहीबार उपसचिवको संयोजकत्वमा तीन सदस्यीय छानबिन समिति गठन गरेको हो ।

प्रदर्शनका क्रममा प्रहरीको गोली लागेर स्थानीय बुद्धिराज न्यौपाने गम्भीर घाइते भएका थिए । उनको उपचारका क्रममा मंगलबारै राति काठमाडौंमा मृत्यु भएको थियो ।

बर्दिबास नगरपालिका–१४ की छ वर्षीया गुलाबसा खातुनको हत्यापछि प्रदर्शन चर्किएको थियो । बलात्कारपछि बालिकाको हत्या गरिएको भन्दै आफन्त र स्थानीयबासी प्रदर्शनमा उत्रिएका थिए ।

हत्या गरी बोरामा कोचेर फालिएको अवस्थामा खातुनको शव मंगलबार बिहान बर्दिबास–१४ स्थित उनको घरनजिकै फेलापरेको थियो ।

दोषीलाई कडा कारबाही गर्नुपर्ने मागसहित शव सडकमा राखेर गरिएको प्रदर्शनलाई नियन्त्रणमा लिन प्रहरीले गोली चलाएको थियो ।

गोली लागेर न्यौपाने गम्भीर घाइते भएका थिए । बर्दिबासस्थित पिनाकल अस्पतालमा प्राथमिक उपचारपछि उनलाई थप उपचारका लागि हेलिकोप्टरबाट काठमाडौं ल्याइएको थियो । उपचारकै क्रममा उनको ग्रान्डी अन्तर्राष्ट्रिय अस्पतालमा मृत्यु भएको हो ।

प्रदर्शनका क्रममा घाइते भएका अरुको काठमाडौंमै उपचार भइरहेको छ । मन्त्रालयले मृतक खातुन र प्रदर्शनका क्रममा मृत्यु भएका न्यौपानेका परिवारलाई उचित राहत उपलब्ध गराउन प्रक्रिया अगाडि बढाइसकेको जनाएको छ ।

यस्तै, घाइतेहरुको उपचार खर्च सरकारले व्यहोर्ने प्रक्रिया पनि अगाडि बढाइएको जनाइएको छ । खातुनको हत्यामा संलग्नलाई पक्राउ गरी कानुनी कारबाही थालिएको मन्त्रालयले जनाएको छ ।

विज्ञापन बक्स