बार्सिलोनाको कप्तान मेस्सी नै रहने

0SHARES

२८ भाद्र २०७७ नेपाल टाईम्स

२८ भदौ, एजेन्सी । क्याटलान क्लब बार्सिलोनाको कप्तान अर्जेन्टिनी स्टार फरवार्ड लियोनल मेस्सी नै रहने भएका छन् । बार्सिलोनाले शनिबार मेस्सी नै यो सिजनको कप्तान रहेको पक्का गरेको हो ।

सन् २०१८ देखि बार्सिलोनाको कप्तान रहेका मेस्सीले नयाँ सिजन सुरु हुनुअघि नै क्लब छाड्ने निर्णय र नाटकीय रुपमा बार्सिलोना बस्न यु टर्न भएपछि क्लबको कप्तान को हुने भन्नेमा अन्योलता देखिएको थियो ।

अब ३३ वर्षीय मेस्सीले नयाँ प्रशिक्षक रोनाल्ड कोम्यानको अन्डरमा बार्सिलोनाको कप्तानी सम्हाल्नेछन् । बार्सिलोनाले सर्जियो बुस्क्वेट्स, जेरार्ड पिके र सर्जी रोबर्टाेलाई दोस्रो, तेस्रो र चौथो कप्तान रहनेछन् ।

बार्सिलोनाले चारै खेलाडीलाई एक साथ राख्दै मेस्सी, बुस्क्वेट्स, पिके र रोबर्टाेले यस सिजन बार्सिलोनाको कप्तानी सम्हाल्ने बताएका छन् । सन् २०१८ मा आन्द्रेस इनिष्टाले बार्सिलोना छाडेपछि अर्जेन्टिनी स्टार मेस्सी नै बार्सिलोनाको कप्तान रहँदै आएका छन् । अब बार्सिलोनामा मेस्सीको कप्तानी तेस्रो सिजनमा चल्नेछ ।

यसैविच, क्याटलान क्लब बार्सिलोनाले प्रि–सिजनको मैत्रीपुर्ण खेलमा सहज जित हात पारेको छ । बार्सिलोनाले दोस्रो डिभिजिनको क्लब जिम्नास्टिक डि टारागोनामाथि ३–१ को सहज जित हात पारेको हो ।

बार्सिलोनाको सहज जितमा औसमाने डेम्वेले, एन्टोइन ग्रिजमन र फिलिपे कौटिन्होले गोल गरे । जिम्नास्टिकका जाभी बोनिल्लाले एक गोल फर्काए । बार्सिलोना छाड्ने सनसनी पुर्ण निर्णय गरेर यु टर्न भएका अर्जेन्टिनी स्टार लियोनेल मेस्सीले टोलीको कप्तानी गर्दै पहिलो खेल खेले । उनले पहिलो हाफ खेलेका थिए ।

विज्ञापन बक्स