बुढासुब्बा गोल्डकपमा मेचीलाई हराउदै संकटा सेमिफाइनलमा

0SHARES

२८ माघ २०७५ नेपाल टाईम्स

धरान, माघ २८
अन्तर्राष्ट्रिय आमन्त्रण बुढासुब्बा गोल्डकपको २१ औं संस्करण आईतबारदेखि धरानमा सुरु भएको छ । धरान फुटबल क्लवको आयोजनामा धरान रंगशालामा सुरु भएको बुढासुब्बा गोल्डकपको राष्ट्रिय खेलकुद परिषद्का सदस्य सचिव केशव विष्टले बेलुन उडाएर उद्घाटन गरे । विष्टले चाँडै नै रंगशालाको स्तरउन्नति गरिने बताउँदै मोफसलमै एक्काईस वर्षदेखि निरन्तर आयोजना हुँदै आएको फुटबल प्रतियोगिता अझ राम्रो तरिकाले अगाडि बढ्नेमा आशावादी रहेको बताए ।

प्रतियोगिताको उद्घाटन खेलमा मेची नेत्रालय काकड्भिट्टा फुटबल ट्रेनिङ सेन्टरलाई हराउँदै सिएमजी संकटा क्लव सेमिफाइनलमा पुगेको छ । सोमबार बिहान भएको खेलमा मेची नेत्रालय काकरभिट्टालाई सडन डेथमा हराउँदै संकटा सेमिफाइनलमा पुग्न सफल भएको हो । माघ २६ गतेबाट सुरु हुनुपर्ने गोल्डकप मौसमका कारण खेल रद्द गर्दै आइतबारलाई सारिए पनि खेल निर्णय विना नै सकिएको थियो । खेल अवधिभर दुवै टिमबाट २÷२ गोलमा सकिएपछि खेल ट्राइबेकरमा गएको थियो ।

टाइबेकरमा समेत दुवै टिमबाट बराबरी गोल भएपछि खेल सडन डेथमा गएको थियो । सडन डेथमा समेत दुवै टिमले बराबरी गोल गरेपछि अँध्यारोका कारण सोमबारका लागि खेल स्थगित गरिएको थियो । सोमबार बराबरीमा सुरु भएको खेलमा संकटा विजयी भएको हो । संकटाका गोलकिपर राजबाबु थापा म्यान अफ दि म्याच घोषित भए । उनले १५ हजार रुपैयाँ प्राप्त गरे । टाइब्रेकरमा पहिलो पाँच पेनाल्टी ४–४ को अवस्थामा सकिंदा दुवै टोलीले १–१ प्रहार चुकाएका थिए ।

गोल्डकपको दोस्रो खेल सोमबार नेपाल पुलिस र सहारा क्लव पोखराबीच हुनेछ । ८ टिम सहभागी यस प्रतियोगिताको विजेताले नगद ८ लाख उपविजेताले नगद ४ लाख पाउने आयोजकले जनाएको छ । व्यक्तिगत टाइटलमा पनि बेष्ट गोलरक्षक, बेष्ट डिफेन्स, बेष्ट स्ट्राइकर, बेष्ट प्रशिक्षक, बेष्ट मिड फिल्डर र सर्वाधिक गोलकर्ताले नगद २५ हजार रुपैयासहित ट्रफी पाउने छन। त्यस्तै हरेक खेलको म्यान अफ दी म्याचले नगद १५ हजार रुपैयासहित ट्रफी पाउने छ । म्यान अफ दि सिरिजले होण्डा कम्पनीको डियो स्कुटी पाउने धरान फुटबल क्लवका अध्यक्ष किशोर राईले जानकारी दिए । प्रतियोगिताको फाइनल खेल फागुन ४ गते हुनेछ ।

विज्ञापन बक्स