काठमाडौं, माघ २१
सरकारको नेतृत्व लिने तयारीमा रहेको नेकपा एमालेले भारतीय विदेश मन्त्री सुष्मा स्वराजको नेपाल भ्रमणलाई सकारात्मक रुपमा लिनुपर्ने धारणा सार्वजनिक गरेको छ ।
नेकपा एमालेका सचिव प्रदिप ज्ञवालीले भारतीय विदेशमन्त्री स्वराजको नेपाल भ्रमणलाई लिएर नकारात्मक टिकाटिप्पणी नगर्न पनि सबैमा आग्रह गरे । उनले भारत सरकारले प्रधानमन्त्रीका दुतलाई पठाएर नयाँ बन्ने सरकारसँग सहकार्य गर्छु भन्ने सन्देश दिनुलाई अन्यथा लिन नहुने पनि स्पष्ट पारे ।
आज काठमाडौंमा आयोजित साक्षात्कार कार्यक्रममा बोल्दै सचिव ज्ञवालीले विगतमा नयाँ सरकार बन्ने बेला विदेशीको आर्शिवाद लिने गरेको सन्देश जाने गरेको स्मरण गराउँदै अहिले भारत सरकारले आफ्ना दुतलाई नेपाल आएर नयाँ बन्न लागेको सरकारलाई बधाई दिनु नेपालको लागि ठूलो उपलब्धि मान्नुपर्ने धारणा समेत राखे ।
सचिव ज्ञवालीले भारतीय विदेश सचिव स्वराजको नेपाल भ्रमण भारतीय चाहना अनुसार भएको पनि स्पष्ट पारे । उनले नेपालमा आएको राजनीतिक परिवर्तनप्रति खुसी व्यक्त गर्न र नयाँ सरकारसँग सहकार्य गरेर अघि बढने सन्देश दिन भारतीय प्रधानमन्त्री नरेन्द्र मोदीले विदेश सचिव स्वराजलाई नेपाल पठाएको पनि बताए । सचिव ज्ञवालीले नयाँ सरकारले आर्थिक विकास र समृद्धिलाई उच्च प्राथमिकता दिने पनि बताए ।
