विराटनगर, पुस २२
मोरङको बुढीगंगा गांउपालिकामा अन्तर्राष्ट्रिय महिला कबड्डी प्रतियोगिता हुने भएको छ । मोरङ जिल्ला कबड्डी संघको आयोजनामा यहि पौष २७ गतेदेखि तीनदिने अन्तर्राष्ट्रिय कबड्डी प्रतियोगिता हुन लागेको हो ।
आयोजक मोरङ कबड्डी संघले प्रतियोगितास्थल बुढीगंगा गांउपालिका ३ स्थित जनप्रिय माध्यमिक विद्यालयमा पत्रकार सम्मेलनको आयोजना गरि सो बिषयमा जानकारी गराएको हो । सो बिषयमा जानकारी गराउँदै मोरङ जिल्ला कबड्डी संघका अध्यक्ष भुवनेश्वर मण्डलले पौष २७ गतेबाट शुरु हुने प्रतियोगिता २९ गतेसम्म संचालन हुने बताए ।
उनले प्रदेश एकमा पहिलो पटक आयोजना हुन लागेको अन्तर्राष्ट्रिय महिला कबड्डी प्रतियोगिता यसक्षेत्रको गौरवको बिषय रहेको समेत उल्लेख गरे । तीन बर्षदेखिको निरन्तरको प्रयासपछि यस पटक अन्तर्राष्ट्रिय प्रतियोगिता आयोजनागर्न लागिएको उनको भनाई थियो । प्रतियोगितामा बंगलादेश,श्रीलंका र भारतका एकएक टिम सहित नेपालबाट नेपाल आर्मी र नेपाली कबड्डी राष्ट्रिय टोली सहित ५ वटा टीमको को सहभागिता रहने आयोजक संघका सचिव उपेन्द्र यादवले जानकारी दिए ।
प्रतियोगितामा सहभागि हुने १४ जना रेफ्रीहरुले भत्ता नलिने घोषणा गरेको समेत सो अवसरमा जनाइएको थियो । प्रतियोगितामा बिजयी हुने टिमलाई नगद पुरस्कार सहित शिल्ड प्रदान गरिने जनाइएको छ । हाल नेपाली खेलाडीहरुकालागि बन्द प्रशिक्षण समेत संचालन गरिएको छ ।
