विराटनगर, फागुन २०
नेपाल संगीत तथा नाट्य प्रज्ञा प्रतिष्ठान र सांस्कृतिक संस्था राष्ट्रिय नाचघरको संयुक्त आयोजनामा मंगलबारदेखि विराटनगरमा राष्ट्रिय महिला नाट्य महोसत्व हुने भएको छ ।
विराटनगरस्थित आरोहरण गुरुकुलको सुशीला कोइराला नाटकघरमा मञ्चन हुने नाटकमा महिला कलाकारले मात्रै अभिनय गर्नेछन् ।
तीनदिनसम्म चल्ने महोत्सवमा हरेक दिन तीनवटा शो हुनेछ । कार्यक्रमबारे जानकारी दिनुहुँदै प्रज्ञा प्रतिष्ठानका नाट्य विभाग प्रमुख प्राज्ञ रमेशरञ्जन झाले नेपालमै पहिलोपटक यस किसिमको कार्यक्रम गर्न लागिएको बताए ।
उनका अनुसार लोसञ्चार नाट्य समूह जनकपुर, झोराहाट नाट्य समूह मोरङ, परिवर्तन थिएटर काँकडभिट्टा, शिल्पी कला समूह काठमाडौं, सद्भाव थिएटर, क्षितिज नाट्य समूह विर्तामोड, ख्वाप्कीमी कला संस्थालगायतका नाट्य समूहले महोत्सवमा सहभागिता जनाउँदैछन् ।
रंगमञ्चमा महिला सहभागिता बढाउने उद्देश्यले महोत्सव गर्न लागिएको सांस्कृतिक संस्थानका महाप्रबन्धक राजेश थापाले जानकारी दिए । महोत्सवको सम्पूर्ण तयारी पूरा भइसकेको र कलाकारहरु विराटनगर आउने क्रम सुरु भइसकेको स्थानीय संयोजक प्रविणनारायण चौधरीले जानकारी दिए । महोत्सवको स्थानीय व्यवस्थापन दहेजमुक्त मिथिला र मैथिली सेवासमितिले गरेका छन् ।
