व्यापार घाटा बढ्दै गएकोमा उपराष्ट्रपति चिन्तत

0SHARES

२७ माघ २०७४ नेपाल टाईम्स

काठमाडौं, माघ २७
उपराष्ट्रपति नन्दबहादुर पुनले नेपालको व्यापार घाटा बढ्दै गएकोमा चिन्ता व्यक्त गरेका छन् । उपराष्ट्रपति पुनले चीनसँगको व्यापार घाटा चालू आर्थिक वर्षको पहिलो ६ महिनामा ६६ अरव ३० करोड पुगेको तथ्यांक पेश गर्दै त्यो मुलुकको समृद्धिका लागि सुखद् संकेत नभएको पनि स्पष्ट पारे ।

आज काठमाडौंमा आयोजित नेपाल हिमालय सिमापार वाणिज्य संघको १८ औं वार्षिक साधारण सभालाई सम्बोधन गर्दै उनले मुलुकलाई समृद्ध बनाउन आयात व्यापारलाई घटाउँदै लैजानुपर्नेमा जोड दिए । उपराष्ट्रपति पुनले चीनसँगको व्यापार वृद्धि हुँदै गएकोमा भने खुसी व्यक्त गरे ।

कार्यक्रममा बोल्दै नेपाल उद्योग वाणिज्य महासंघका उपाध्यक्ष उमेशलाल श्रेष्ठले बाम गठबन्धन नेतृत्वमा बन्ने नयाँ सरकारले मुलुकमा आर्थिक उन्नतिको जग बसाल्ने विश्वास व्यक्त गरे । उनले नयाँ सरकार बनेपछि मुलुकमा राजनीतिक स्थायित्व कायम हुने र आर्थिक समृद्धिको आधार तय हुने पनि बताए ।

नेपाल चेम्बर अफ कमर्सका उपाध्यक्ष कमलेशकुमार अग्रवालले नयाँ सरकार बनेपछि मुलुकलाई समृद्ध बनाउने व्यवसायिक वातावरण बन्ने विश्वास व्यक्त गरे । उनले पूर्वाधारको व्यवस्था नगरी मुलुकलाई समृद्ध बनाउन नसकिने पनि स्पष्ट पारे ।

उपाध्यक्ष अग्रवालले पूराना ऐन, कानुनलाई संशोधन गरेर मात्रै मुलुकको निर्यात व्यापारलाई बढाउन सकिने पनि उल्लेख गरे । व्यवसायीहरुले चीनसँगको व्यापार घाटा कम गर्न सरकारले पूर्वाधार विकासमा जोड दिनुपर्ने आवश्यक्ता पनि औंल्याएका थिए ।

विज्ञापन बक्स