साफ च्याम्पियनसिप फुटबलको उपाधि माल्दिभ्सलाई ,सात पटकको विजेता भारत पराजित

0SHARES

३१ भाद्र २०७५ नेपाल टाईम्स

एजेन्सी,भदौ ३१
माल्दिभ्स एक दशकपछि साफ च्याम्पियनसिप (साफ सुजुकी कप) को च्याम्पियन बनेको छ । बंगलादेशको ढाकास्थित बंगबन्धु राष्ट्रिय रंगशालामा शनिबार राती सम्पन्न फाईनल खेलमा साविकको विजेता भारतलाई २–१ ले पराजित गर्दै माल्दिभ्स दोस्रो पटक च्याम्पियन बनेको हो ।

माल्दिभ्सले यसअघि सन् २००८ मा भारतलाई नै १–० ले हराएर पहिलो पटक उपाधि जितेको थियो । कमजोर सुरुवात गरेको माल्दिभ्स भाग्यको सहारामा सेमिफाइनल पुगेको थियो । समूह चरणमा विना जित श्रीलंकासँग अंक र गोलअन्तरमा बराबरी भएपछि टसमा भाग्यशाली रहँदै अघि बढेको माल्दिभ्सले सेमिफाइनलमा नेपाललाई ३–० ले निराश पारेको थियो । फाइनलमा भारतलाई पराजित गरसँगै माल्दिभ्सले यसपटक समूह चरणमा बेहोरेको २–० को हारको बदला समेत लिएको छ ।

माल्दिभ्सले खेलको १९औं मिनेटमा अग्रता बनाएको थियो । इब्राहिम माहुधी हुसेनले हसन नेइजको पासमा डि–बक्सको मध्यभागबाट गरेको फ्लिक प्रहार भारतका गोलरक्षक विशाल केथले रोक्ने कुनै मौका पाएन । १–० ले पछि परेपछि भारतले खेललाई आफ्नो नियन्त्रणमा राखेपनि गोल गर्न सकेन बरु दोस्रो हाफमा थप १ गोल खान पुग्यो ।

६६औं मिनेटमा अलि फसिरले गोल गर्दै माल्दिभ्सको अग्रता दोब्बर पारेका थिए । हम्जाथ मोहमेदको पासलाई अलिले सदुपयोग गरेका थिए । भारतले खेलको अन्त्यतिर गोल फर्काएपछि त्यसले नतिजामा खासै फरक परेन । इन्जुरी समयको दोस्रो मिनेटमा सुमित पासीले गोल गरेका थिए । सात पटकको विजेता भारतले यसपाली भने उप विजेतामा चित्त बुझाउनु पर्यो ।

विज्ञापन बक्स