स्याङ्जामा फ्रान्सको राष्ट्रिय झन्डा र राष्ट्रपति माक्रोंको तस्बिर जलाइयो

0SHARES

१४ कार्तिक २०७७ नेपाल टाईम्स

१४ कात्तिक, स्याङ्जा । स्याङ्जामा फ्रान्सका राष्ट्रपति इम्यानुयल माक्रोंको तस्बिर र फ्रान्सको राष्ट्रिय झन्डा जलाइएको छ ।

राष्ट्रपति माक्रोंले फ्रान्सका सबै सरकारी कार्यालयमा इस्लाम धर्मका अन्तिम सन्देष्टा पैगम्बर मोहम्मदको कार्टुन राख्ने निर्णय गरेका थिए। उक्त निर्णयको विरोधमा स्याङ्जाका मुस्लिम समुदायले पनि विरोध जनाएका छन्।

स्याङ्जाको पुतलीबजार नगरपालिका–३ बाडखोलास्थित अहले सुन्नत बलजमात नुमरा जामाँ मस्जिदले गत मंगलबार माक्रोको तस्बिर जलाएका हुन्।

मस्जिदबाट निस्केको ¥याली बाडखोला चोकमा पुगेर कोण सभा गरेको मस्जिदका सचिव हाजी साह मोहम्मदले जनाए। कोणसभा पछि माक्रोंको तस्बिर जलाएको उनले बताए।

‘विश्वभरका मुस्लिम समुदायले आस्था राख्ने पैगम्बर मोहम्मदको कार्टुन सबै सरकारी कार्यालयमा राख्ने निर्णय गर्नु हाम्रो आस्था माथि मजाक गरेको हो’, मोहम्मदले भने, ‘यसैको विरोधमा हामीले माक्रोंको तस्बिर जलायौं।’

विरोधका अन्य कार्यक्रमका बारेमा बैठक बसेर निर्णय गर्ने उनले बताए।

बाडखोला मुस्लिम समाजका सचिव समेत रहेका मोहम्मदले आज भने उनै पैगम्बर मोहम्मदको जन्मजयन्ती मनाइरहेको बताए।

‘आज उहाँको १४९५ औं जन्मजयन्ती हो, हामी मनाउने तयारी गर्दैछौं’, उनले भने, ‘उहाँका राम्रा कुराहरू सम्झने र प्रसाद ग्रहण गर्छौं।’

मुस्लिम आयोग अध्यक्ष समिम मियाँ अन्सारीले कुनै पनि राष्ट्रको विषयमा विरोध प्रदर्शन कार्यक्रम गर्ने नीति नभएको बताए।

उनले स्याङ्जाको घटनाबारे बुझ्ने बताए।

‘अरूको देशको आन्तरिक मामिलामा विरोध गर्ने हाम्रो नीति हैन, छैन, कसैले गरेको भए त्यो गलत हो, म बुझ्छु,’ उनले भने।

विज्ञापन बक्स