१६ कार्तिक, काठमाडौं ।
दशैं अवधिमा घट्न थालेको विद्युतको माग अहिलेसम्म पनि बढ्न नसक्दा दैनिक ५ करोड रुपैयाँ भन्दा बढी घाटा भइरहेको विद्युत प्राधिकरणले जनाएको छ।
दसैंको भोलिपल्टदेखि दैनिक एक हजार मेगावाट आवरका दरले ऊर्जाको माग बढे पनि त्यो सामान्य समयको भन्दा अझै ५–६ हजार मेगावाट आवरभन्दा कम छ।
सामान्य समयमा दैनिक २८ हजार मेगावाट आवरसम्म ऊर्जा खपत भइरहेकोमा फूलपातीको दिन २२ हजार मेगावाट आवरमा सीमित भएको थियो। त्यसपछि क्रमशः घट्ने क्रममा टीकाका दिन १६ हजार मेगावाट आवर मात्रै ऊर्जा खपत भएको थियो।
टीकाको भोलिपल्टदेखि भने खपत विस्तारै उकालो लाग्दै दैनिक एक हजार मेगावाट आवरले वृद्धि हुन थालेको प्राधिकरणका अधिकारीहरूको भनाइ छ।
गत मंगलबार १७ हजार, बुधबार १८ हजार, बिहीबार १९ हजार र शुक्रबार २१ हजार मेगावाट आवरभन्दा बढी ऊर्जा खपत भएको नेपाल विद्युत प्राधिकरण भारप्रेषण केन्द्रले जनाएको छ।
आइतबारदेखि दसैंको असर सकिने र उद्योगधन्दादेखि व्यापार व्यवसायसम्म पुरानै लयमा फर्किएपछि विद्युत खपत पनि पुरानै लयमा फर्किने प्राधिकरणका अधिकारीहरूको विश्वास छ।
शुक्रबारको २१ हजार ६०० मेगावाट आवर विद्युत ऊर्जाको माग व्यवस्थापनमा नेपाल विद्युत प्राधिकरणका आयोजनाबाट ८ हजार ३०० मेगावाट आवर, निजी क्षेत्रका आयोजनाबाट १२ हजार ३०० मेगावाट आवर र भारतबाट एक हजार मेगावाट आवर विद्युत ऊर्जा आयात गरेर आपूर्ति गरिएको थियो।
माग नबढ्दा विद्युत प्राधिकरणले आफ्ना आयोजना बन्द गरेर निजी क्षेत्रको धेरैभन्दा धेरै विद्युत बजारमा आपूर्ति गरिरहेको छ। अहिले औसत विद्युत माग ६–७ सय मेगावाट आवर भन्दा बढी हुन सकेको छैन।
पिक समयमा भने एक हजार मेगावाट हाराहारी विद्युत माग भइरहेको प्राधिकरणले जनाएको छ। विद्युत खरिद सम्झौता गरेकाले निजी क्षेत्रका सबै आयोजनाको ऊर्जा प्राधिकरणले लिनै पर्छ।
त्यसैले आफ्ना आयोजनाको उत्पादन घटाएर पनि निजी क्षेत्रद्वारा उत्पादित बिजुली प्राधिकरणले लिएर वितरण गरिरहेको छ। खपतको माग नबढ्दा भने घाटा दिनदिनै बढ्ने चिन्ता प्राधिकरणमा छ।
