४ चैत , काठमाण्डौ।
राष्ट्रिय स्वतन्त्र पार्टीले नवनिर्वाचित सांसदहरुको लागि सञ्चालन गरेको अभिमुखीकरण कार्यक्रम आज दोस्रो दिन पनि जारी छ । योग–ध्यान कक्षासँगै दोस्रो दिनको अभिमुखीकरण कार्यक्रम सुरु भएको हो । रास्वपाले ललितपुरको होटल टुलिपमा मंगलबारदेखि अभिमुखीकरण कार्यक्रम सञ्चालन गरेको छ । कार्यक्रम आज सक्ने तयारी छ ।
कार्यक्रममा नवनिर्वाचित प्रत्यक्ष तथा समानुपातिक सांसद सहभागी छन् । रास्वपाले प्रतिनिधि सभा सदस्यको निर्वाचनमा १ सय ८२ सिट जितेको छ । आफ्ना अधिकांश सांसद नयाँ भएकाले संसदीय अभ्यास र आचारसंहिता लगायत विषयमा अभिमुखीकरण र प्रशिक्षणका दिनको लागि यो कार्यक्रम आयोजना गरिएको रास्वपाले जनाएको छ ।
अभिमुखीकरणमा सांसदलाई संसदीय अभ्यास, नीति निर्माण, संसद्को कार्यप्रणाली तथा जनप्रतिनिधिको जिम्मेवारी, पार्टीले अवलम्वन गर्नुपर्ने नीति लगायतमा प्रशिक्षित दिइएको रास्वपाले जनाएको छ । सार्वजनिक गरेको कार्यतालिका अनुसार अन्त्यमा पार्टी सभापति रवि लामिछानेको सम्बोधनसँगै कार्यक्रम समापन हुनेछ ।
आज सुरुमा पूर्वसचिव डा.तोयानारायण ज्ञवालीले सरकार सञ्चालन प्रक्रिया, योजना तथा बजेट निर्माणबारे प्रशिक्षण दिएका छन् । ज्ञवालीको प्रशिक्षणपछि अर्का पूर्वसचिव प्रताप कुमार पाठकले ‘सुशासन, अवधारणा र अभ्यास’ सम्बन्धमा प्रशिक्षण दिदैछन् । त्यसपछि महामन्त्री कविन्द्र बुर्लाकोटी र केन्द्रीय सदस्य आरके ढुंगानाले पार्टी र सांसदको सम्बन्ध स् नयाँ राजनीतिक संस्कारमा सांसदको भूमिका, आचारसंहिता तथा न्यूनतम प्रतिबद्धता’का विषयमा प्रस्तुति दिनेछन्।
प्रस्तुतिपछि सांसदहरुद्वारा एजेण्डा प्राथमिकता निर्धारण सम्बन्धमा समूह कार्य तथा प्रस्तुति रहने कार्यतालिका छन् । मध्याह्न १२ बजेपछि हुने समापन सत्रमा प्रतिभा रावल र मनिष झाले एजेण्डा प्राथमिकता निर्धारणको प्रस्तुति प्रस्तुत गर्न सहजीकरण गर्नेछन् । कार्यक्रममा जेनजी सांसदद्व प्रशान्त उप्रेती र खिमा विकले धन्यवाद मन्तव्य व्यक्त गर्ने तालिका छ ।
अन्त्यमा सभापति रवि लामिछानेले पार्टीको रणनीति, दृष्टिकोण र नीतिगत प्राथमिकताबारे मन्तव्य राख्ने कार्यक्रम छ । अभिमुखीकरण कार्यक्रमको रास्वपाका उपभासपतिद्वय डोलप्रसाद अर्याल र डा. स्वर्णिम वाग्लेले मंगलबार घण्टी बजाएर उद्घाटन गरेका थिए । उद्घाटन समारोहमा रास्वपा वरिष्ठ नेता बालेन्द्र शाह (बालेन) पनि सहभागी हुने भनिएको थियो ।
तर, वरिष्ठ नेता शाह भने हिजोको कार्यक्रममा उपस्थित भएनन् । उनी स्वास्थ्यको कारण कार्यक्रममा सहभागी नभएको बताइएको छ । हिजोको कार्यक्रममा सभापति लामिछाने पनि सहभागी भएका थिएनन् । आज भने उनैले कार्यक्रमको समापन गर्नेछन् । तर बालेन्द्र शाह सहभागी हुने सम्भावना भने आज पनि न्यून छ ।
बालेन निकट एक सांसदका अनुसार, कार्यव्यस्तताका कारण उनी सहभागी हुने सम्भावना न्यून छ । अभिमुखीकरण कार्यक्रमको कार्यसूचीमा पनि बालेन सहभागी हुने कार्यसूची छैन । यद्यपि, बालेनलाई पनि कार्यक्रममा उपस्थित गराउने प्रयास भइरहेको छ ।
रास्वपाकी सहप्रवक्ता प्रतिभा रावलका अनुसार नेपाली जनताले परिवर्तन, सुशासन, पारदर्शिता र उत्तरदायी नेतृत्वको अपेक्षासहित आफूहरूलाई संसद्मा पठाएको हुनाले अभिमुखीकरण कार्यक्रम गरिएको हो । ‘नवनिर्वाचित सांसदहरूलाई संसदीय प्रक्रिया, कानुन निर्माण, नीति विश्लेषण र जनप्रतिनिधिको भूमिकाबारे स्पष्ट रूपमा बुझाइन्छ । सांसदहरूलाई प्रभावकारी, उत्तरदायी र परिणाममुखी प्रतिनिधि बन्न सहयोग पु¥याउने उद्देश्य हो,’ सहप्रवक्ता रावलले भनिन्, ‘पार्टीको रणनीति, दृष्टिकोण र नीतिगत प्राथमिकता स्पष्ट गराइन्छ । संसद्, सरकार र निर्वाचन क्षेत्रबीच प्रभावकारी समन्वय कायम गर्न सक्षम बनाइने छ।’
जनताको विश्वास र आशालाई सार्थक बनाउँदै प्रभावकारी, जिम्मेवार र परिणाममुखी संसदीय भूमिका निर्वाह गर्नु प्रत्येक सांसदको महत्वपूर्ण दायित्व भएको महसुस गराइने सहप्रवक्ता रावलले जानकारी दिइन्। ‘अन्य दलका उम्मेदवार मात्र होइन जो कोही व्यक्तिलाई तुच्छ टीकाटिप्पणी नगर्ने, होच्याउने, हेप्नुहुँदैन भन्नेमा हामी प्रष्ट छौं,’ सहप्रवक्ता रावलले भनिन्, ‘सांसदहरूलाई अनुशासित गराउने उद्देश्यले पनि अनुशिक्षण कार्यक्रम गरिएको हो।’
संसदीय अभ्यास, विधायिकी प्रक्रिया, नीति निर्माण, संसदीय समितिहरूको भूमिका, बजेट तथा कानुन निर्माण प्रक्रिया, साथै निर्वाचन क्षेत्रमा जनतासँग प्रभावकारी सम्बन्ध कायम राख्ने विषयहरूबारे स्पष्ट समझ र साझा दृष्टिकोण विकास गर्ने आवश्यक महसुस भएको रास्वपाका एक शीर्ष नेताले बताए ।
सांसदहरूलाई नेपालको संवैधानिक व्यवस्था, संसद् सञ्चालन प्रणाली, विधायन प्रक्रिया, सुशासन र पारदर्शिताका मापदण्ड, नीति विश्लेषण, जनप्रतिनिधिको आचरण, सञ्चार तथा सार्वजनिक उत्तरदायित्व जस्ता विषयहरूमा जानकारी प्रदान गरिनेछ ।
साथै पार्टीको नीतिगत प्राथमिकता, रणनीतिक कार्यदिशा तथा संसदभत्र र बाहिर प्रभावकारी समन्वयका उपायहरूबारे साझा समझ विकास गरिने रास्वपाले जनाएको छ । अभिमुखीकरण कार्यक्रमले नवनिर्वाचित सांसदहरूलाई आफ्नो जिम्मेवारी प्रभावकारी रूपमा निर्वाह गर्न आवश्यक ज्ञान, सीप र दृष्टिकोण प्रदान गर्दै, जनताको अपेक्षालाई नीतिगत उपलब्धिमा रूपान्तरण गर्न सहयोग पु¥याउने विश्वास गरिएको ती नेताले बताए ।
