विराटनगर,जेठ ८ ः करिब ३८ क्वीन्टल सुन तस्करी र सनम शाक्य हत्या प्रकरणका मुख्य नाइके गोरे भनिने चुडामणि उप्रेती पक्राउ परेका छन् ।
सुन तस्करी र सनम शाक्यको हत्याको अनुशन्धान गर्न गठन भएको समितिले गोरेलाई मंगलबार गृहमन्त्रालयमा पत्रकार सम्मेलनको आयोजना गरि सार्वजनिक गरेको हो ।
समितिका संयोजक ईश्वरराज पौडेलले गोरे काठमाडौंमा आएको विशेष सूचनाका आधारमा उनलाई पक्राउ गरिएको जानकारी दिए । उनको अनुसार गोरेलाई आजै मोरङ जिल्ला अदालतमा प्रस्तुत गर्ने गरी विराटनगर पठाउन लागिएको छ ।
सुन तस्करी र सनम शाक्यको हत्या मुद्दामा प्रहरीले कूल ६३ जनाविरुद्ध मुद्दा दायर गरेको थियो । ती मध्ये ३० जना प्रहरीको नियन्त्रणमा छन् भने ३३ जना फरार रहेका छन् । प्रहरीले मुख्य अभियुक्त भनिएका चूडामणि उप्रेती (गोरे) सहित फरार सबैको खोजी गरिरहेको जनाएको थियो ।
जिल्ला न्यायाधिवक्ताको कार्यालयले गत बुधबार जिल्ला अदालतमा ‘आपराधिक समुह स्थापना र सञ्चालन गरी सुनको अवैध कारोबार गरेको, अपहरण तथा शरिर बन्धक र कर्तब्य ज्यान’ मुद्दा दर्ता गरेको थियो । मुद्दामा उनीहरुविरुद्ध १७ अर्ब १ करोड ८० लाख ७१ हजार ४ सय १३ रुपैयाँ ९० पैसा बिगो माग दाबी गरिएको छ ।
