वीरगन्ज: तेस्रो मुलुकबाट कन्टेनरमा बन्द भई नेपाल आयात हुने मालबस्तुको ब्यापार २०.४१ प्रतिशतले घटेको तथ्यांकले देखाएको छ। नेपालका लागि कन्टेनर बन्द मालबस्तु भारतीय बन्दरगाहहरु पश्चिम बंगालको कोलकाता बन्दरगाह, कोलकता मातहतकै हल्दिया बन्दरगाह र निजी क्षेत्रबाट ब्यवस्थापन गरिएको आन्ध्र प्रदेशको विशखापटनम बन्दरगाहबाट भएर नेपाल आउने गरेको छ। ति बन्दरगाहको पछिल्लो तथ्यांकअनुसार विदेशाट नेपालका लागि आउने कन्टेनर कार्गोको आयात घटेको देखिएको छ।
अंग्रेजी आर्थिक वर्ष २०२०/०२१ को २ चौमासिकअर्थात ८ महिनामा कोलकाता बन्दरगाहबाट चौंतिस हजार १७ वटा र विशखा पटनमबाट एक्काइस हजार ६४७ कन्टेनर (२० फिट इकाईमा) नेपालका लागि आएका छन्। अंग्रेजी आर्थिक वर्ष २०२०/०२१ को अप्रिलदेखि नोभेम्बरसम्ममा समग्रमा तेस्रो समुद्रपारका मुलुकहरुबाट ५५ हजार ६ सय ६४ ओटा कन्टेनर मालसामान नेपाल आएको यस तथ्यांकले देखिन्छ। पोहोर यसै अवधीमा भारतको कोलकाता र विशाखापटनमबाट नेपालका लागि ६७ हजार ९ सय ४५ कन्टेनर आएका थिए। यस वर्ष आएका कन्टेनरको संख्या गत वर्षको भन्दा २०.४१ प्रतिशतले कम हो।
भारतको कोलकातास्थित नेपाल पारवहन तथा गोदाम व्यवस्था कम्पनीका शाखा प्रमुख लक्ष्मण खड्काले समुद्रपारबाट भारतीय बन्दरगाह हुँदै आउने कार्गोमा कमी हुनुले विदेशबाट हुने आयात घटेको देखिएको बताए। उनकाअनुसार कोलकाता र बिशाखापटनम बन्दरगाहबाट ३ सय ७३ र्याक कन्टेनर मालवाहक रेलमा वीरगन्ज सुक्खा बन्दरगाहमा आएको छ। एक र्याकमा २० फिट इकाइको ९० वटा कन्टेनर आउने गर्छ। यस हिसाबले ३३ हजार ५ सय ७० वटा कन्टेनर भारतीय बन्दरगहहरुबाट रेलमा नेपालका लागि आएका छन्। अरु २२ हजार ९४ कन्टेनर सडक मार्गबाट नेपाल भित्रिएका छन्।, यो खबर आजको नागरिक दैनिकमा छापिएको छ।
