२१ मंसिर, एजेन्सी ।
बेलायतकी महारानी एलिजाबेथ द्धितियले कोरोना भाइरसविरुद्धको खोप सार्वजनिक रुमपै लगाउने भएकी छिन् ।
अबको केही हप्ता भित्रै उनले खोप लगाउने तयारी रहेको बेलायती सञ्चारमाध्यमले जनाएका छन् । बेलायतले फाइजरको खोप सर्वसाधारणको प्रयोगका लागि स्वीकृति प्रदान गरिसकेको छ र खोपको पहिलो खेप बेल्जियमबाट आइसकेको छ ।
अबको केही दिनभित्रै बेलायतमा प्राथमिकता सूचिका आधारमा खोप लगाउन सुरु हुने त्यहाँको स्वास्थ्य मन्त्रालयले जनाएको छ । महारानी एलिजाबेथले सर्वसाधारणलाई खोप लगाउनका लागि उत्साहित गर्ने उद्देश्यसहित चाँडै नै खोप लगाउने तयारी भएको बेलायती सञ्चारमाध्यमले जनाएका छन् ।
महारानीसँगै ९९ वर्षका प्रिन्स फिलिपले पनि खोप लगाउने छन् । उनीहरुले खोप लगाउनका लागि कुनै विशेष पहुँच वा प्रभावको प्रयोग नगरी पहिलो चरणको खोप अभियान सुरु भएपछि लाइनमा बसेर खोप लिने बताएका छन् ।
डाक्टरको सल्लाहमा महारानी र प्रिन्स फिलिपले खोप लगाउने तयारी गरेको द डेलीमेलले जनाएको छ । महारानी र प्रिन्सले सार्वजनिक रुपमा खोप लगाउँदा सर्वसाधारणमा खोपलाई लिएर रहेको गलत सूचनाको प्रभाव हटाउन सहयोग पुग्ने जनस्वास्थ्यविदले बताएका छन् ।
यसैबिच अमेरिकाका तीन पूर्व राष्ट्रपतिले पनि सार्वजनिक रुपमा खोप लगाउने बताइसकेका छन् । अमेरिकामा फाइजर र मोदेर्नाको खोप सर्वसाधारणको प्रयोगका लागि स्वीकृति माग गरी निर्माता कम्पनीले निवेदन दिएका छन् ।
डिसेम्बरको दोस्रो हप्ता अमेरिकी नियामक निकाय फुड एण्ड ड्रग एड्मिनिस्ट्रेसनले खोपलाई स्वीकृति प्रदान गर्ने अपेक्षा छ । पूर्व राष्ट्रपतिहरु बाराक ओबामा, जर्ज डब्लु बुस र बिल क्लिन्टनले खोप उपलब्ध भएपछि टेलिभिजनमै खोप लगाउने बताएका छन् ।
उनीहरुले सर्वसाधारणलाई खोप लगाउनका लागि उत्साहित गर्ने उद्देश्यसहित खोप सार्वजनिक रुपमा लगाउने बताएका हुन् ।
