विराटनगर,जेठ ११ ः नेपालका चर्चित अभिनेता अनमोल केसी १० औँ “डि सिने अवार्ड”मा उत्कृष्ट अभिनेता घाषित भएका छन् ।
केहीअघि मात्र सम्पन्न छैटौं एनएफडीसी अवार्डमा सर्वोत्कृष्ट अभिनेताको ट्रफी जितेका अनमोल केसीले फेरि पनि त्यस्तै सफलता चुमेका हुन् । राष्ट्रिय सभागृहमा बिहीबार आयोजित छायाछवि दसौं डी सिने अवार्डमा उनलाई ‘कृ’ फिल्मको भूमिका लागि सर्वोत्कृष्ट घोषित गरियो ।
अनमोलकै ‘कृ’ लाई उत्कृष्ट फिल्म मानियो । उत्कृष्ट एनिमेसनमा ग्लेज इन्टरटेन्मेन्ट र छायांकारमा पुरुषोत्तम प्रधानलाई ‘कृ’ ले नै सफलता दिलायो ।
उत्कृष्ट अभिनेताको ट्रफी चुम्दै अनमोलले भने ‘यो अवार्ड मेरा लागि अवार्ड मात्र होइन, फिल्म क्षेत्रप्रतिको जिम्मेवारी पनि हो । सबैलाई थ्यांक यु भन्न चाहन्छु ।’
त्यस्तै वरिष्ठ अभिनेत्री वसुन्धरा भुसाललाई ‘लाइफटाइम लिजेन्ड्री अवार्ड’ स्वरूप सम्मानपत्र र २५ हजार रुपैयाँ प्रदान गरियो । सात वर्षको कलिलो उमेरदेखि कला यात्रा थालेकी भुसालले नेपालमा बनेको पहिलो फिल्म ‘आमा’ हुँदै ‘हिजो आज भोलि’, ‘मनको बाँध’, ‘सिन्दुर’, ‘जीवनरेखा’ लगायत सयौं फिल्ममा अभिनय गरेकी छन् । 
पुष्पल खड्काले क्रिटिक्सका तर्फबाट उत्कृष्ट अभिनेताको ट्रफी पाए भने मोहन निरौला, राजेन्द्र उप्रेती, डब्बु क्षत्री, सन्तोष श्रेष्ठ र शबनम मुखियाको निर्णायक टोलीले ‘संरक्षण’ फिल्मका निर्देशक पूर्णेन्द्र झालाई इन्करेजमेन्ट अवार्ड दियो । पब्लिक च्वाइस अवार्डमा हरिवंश आर्चायको ‘शत्रु गते’ ले बहुमत ल्याएको बताइयो ।
सर्वोत्कृष्ट अभिनेत्रीमा ‘पञ्चायत’ बाट नीता ढुंगानालाई भईन् भने नव–अभिनेतामा सलिनमान बानियाँ र अभिनेत्रीमा जसिता गुरुङ सर्वोत्कृष्ट घोषित भए । ‘ए मेरो हजुर २’ का लागि झरना थापालाई नवनिर्देशकका रूपमा स्याबासी दिइयो ।
त्यस्तै चलचित्र ऐश्वर्यामा उत्कृष्ट अभिनय गरेका प्रशान्त ताम्राकार उत्कृष्ट खलपात्र भए । उनको नाम सुनाउनुअघि नै दर्शकहरू भन्दै चिच्याएका थिए ।
त्यस्तै उत्कृष्ट कथा विधामा ‘भुइँमान्छे’ का लागि नवराज बुढाथोकी र पटकथामा प्रदीप भारद्वाजले ‘लिलीबिली’ बाट अवार्ड हात पारे । उत्कृष्ट संवाद विधामा ‘घामपानी’ फिल्मबाट निर्देशक दीपेन्द्र लामालाई अवार्ड दिइयो । चरित्र अभिनेत्रीको विधामा मिथिला शर्माको नाम आयो ।
‘छक्का पञ्जा २’ की वर्षा राउत र ‘ए मेरो हजुर २’ का सलोन बस्नेत सहायक भूमिकामा अब्बल ठहरिए । फिल्म सम्पादक मित्रदेव गुरुङले ‘मंगलम्’ मा गरेको कामको सराहना भइरहँदा ‘रुद्र’ बाट हिमाल केसी उत्कृष्ट द्वन्द्व निर्देशक चुनिए ।
बालकलाकारमा ‘पिँजडा ब्याक अगेन’मा अभिनित कुशाग्र भट्टराईलाई फाप्यो । उत्कृष्ट हास्यकलाकार केदार घिमिरे ‘माग्नेबूढा’ ले ले अवार्ड हात पारे ।
‘लिलीबिली’ को पाश्र्व संगीत उत्कृष्ट मानिएपछि एलिश कार्कीको भागमा ट्रफी आइपुग्यो । सुनयमान श्रेष्ठलाई ‘संरक्षण’ बाट उत्कृष्ट ध्वनि मिश्रण विधामा अवार्ड दिईयो भने पिल्मको ‘सम्झनाको सारंगी’ गीतका लागि धीरेन्द्र प्रेमर्षिलाई उत्कृष्ट गीतकार घोषित गरियो ।
त्यस्तै उत्कृष्ट गायकमा सुगम पोखरेल र गायिकामा बिन्दु परियारको नाम आयो । संगीतकारमा ‘कुटुमा कुटु’ गीतका लागि राजनराज शिवकोटी उत्कृष्ट मानिए भने गीतमा नृत्य निर्देशन गरेका कविराज गहतराजले पनि ट्रफी हात पारे ।
समारोहमा अभिनेत्री मौसमी मल्ल र फिल्मकर्मी नरेन्द्र महर्जनलाई चलचित्र रजत सम्मान प्रदान गरियो । सञ्चारकर्मी श्याम अर्यालले चलचित्र पत्रकारिता पुरस्कारस्वरूप १० हजार हात पारे ।
