१० पुष, काठमाडौं । सत्तारुढ नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’को साथ छाडेका ६ जना नेतालाई मन्त्रीपरिषद्मा स्थान मिलेको छ ।
शुक्रबार प्रधानमन्त्री केपी शर्मा ओलीले मन्त्रीपरिषद पुनर्गठन गर्दा ६ पूर्वमाओवादी नेता मन्त्री बनेका छन् । टोपबहादुर रायमाझी, मणि थापा, गौरीशंकर चौधरी, प्रभु शाह र दावा तामाङलाई मन्त्री र विमला विकलाई राज्यमन्त्री बनाउँदै प्रधानमन्त्री ओलीले मन्त्रीपरिषद् हेरफेर र विस्तार गरेका छन् । प्रतिनिधिसभा विघटन गरेपछि ७ मन्त्रीले राजीनामा दिएसँगै नेकपा फुटको वैधानिकता पर्खिरहेको छ । प्रचण्ड माधव समूह छाड्दै ओली समूहमा समर्थन दिएका नेताहरुलाई प्रधानमन्त्रीले साथ लिँदै मन्त्री पद दिएका हुन । नवनियुक्त मन्त्रीहरुलाई शुक्रबार साँझै राष्ट्रपति कार्यालयमा सपथ ग्रहण गराइएको छ ।
