पर्सा: आयातका लागि मुख्य नाका रहेको वीरगन्जबाटै सवारीसाधन आयात घट्दो छ । यसले सवारीसाधनको आयातबाट संकलन हुने राजस्वमा पनि गिरावट आएको छ । वीरगन्ज भन्सार कार्यालयको गत आर्थिक बर्षको र चालु आर्थिक बर्षको मंसिरसम्मको तथ्यांकले यो नाका भएर हुने प्रायः सवारीसाधनको आयात घटेको देखाउँछ ।
चालु आर्थिक वर्षको मंसिरसम्म यो नाका हुँदै २ अर्ब ८२ करोड रुपैयाँ बराबरको २ हजार ५ सय ७८ थान जिप, कार, भ्यान आयात भएका छन् । गत आवको यसै अवधिमा ४ अर्ब १२ करोड रुपैयाँ बराबरको ४ हजार २ सय ५१ थान सवारीसाधन आयात भएका थिए । चालु आर्थिक वर्षमा सवारीसाधनको आयात झन्डै आधा घटेको छ ।
चालु आवको मंसिरसम्म यो नाका हुँदै ३ अर्ब २९ करोड रुपैयाँ बराबरको ३७ हजार ६ सय ६१ थान मोटरसाइकल आयात भएको छ । गत आर्थिक वर्षको यसै अवधिमा ३ अर्ब ६९ करोड रुपैयाँ बराबरको ४३ हजार ५ सय ७२ थान मोटरसाइकल आयात भएको थियो । चालु आर्थिक वर्षको मंसिरसम्म ७२ करोड ६२ लाख रुपैयाँ बराबरको ५ सय ६ थान डबल क्याब पिकअप गाडी आयात भएको छ । गत आर्थिक वर्षको सोही अवधिमा यस्तो सवारी १ अर्ब ५६ लाख रुपैया बराबरको ७ सय ३० थान आएको थियो ।
चालु आर्थिक वर्षको मंसिरसम्म ३५ करोड ७८ लाख रुपैयाँ बराबरको ५ सय ६२ थान सिंगल क्याब पिकअप गाडी यो नाका भएर आएका छन् । गत आर्थिक वर्षको सोही अवधिमा ५३ करोड ३४ लाख रुपैयाँ बराबरको ७ सय ६५ थान यस्ता सवारी आयात भएका थिए । चालु आर्थिक वर्षको मंसिरसम्म यो नाका भएर १ अर्ब १२ करोड रुपैयाँ बराबरको ४ सय ८० थान ट्रक तथा मिनी ट्रक आयात भएका छन् । गत आर्थिक वर्षको यसै अवधिमा २ अर्ब २९ करोड रुपैयाँ बराबरका ८ सय ६७ थान यस्ता सवारीसाधन आएका थिए ।
यो नाकाबाट बस ट्रकका चेसिस, अटोरिक्सा र मिनी बसको आयात पनि घटेको छ । यस वर्ष मंसिरसम्म यो नाका हुँदै ५३ करोड ९९ लाख रुपैयाँ बराबरका २ सय ९७ थान बस ट्रकका चेसिस आयात भएको भन्सार कार्यालयको तथ्यांक छ । गत आर्थिक वर्षको सोही अवधिमा १ अर्ब १३ करोड रुपैया बराबरका ६ सय ७८ थान यस्ता सवारी भित्रिएका थिए ।,यो समाचार आजको कान्तिपुर दैनिकमा छ ।
