विराटनगर,जेठ १८
माेरङकाे रंगेली नगरपालिका वडानम्बर–४ का बडाध्यक्ष र सदस्यहरुले बाढी पीडितकालागि राहतस्वरुप आएको रकमबाट कमिशन असुल्ने गरेको खुलासा भएको छ ।
राहत रकम उपलब्ध गराउन सहयोग गरिदिएवापत उनिहरुले रकम असुल्ने गरेकाे खुलेकाे हाे ।
कमिशन बुझाउन बाध्य भएका बाढी पीडितहरुले शुक्रबार पत्रकार सम्मेलनको आयोजना गरेर सो बिषयमा जानकारी गराएका हुन ।
रंगेली नगरपालिका वडानम्बर ४ का वडाध्यक्ष भुपेन्द्र मण्डलले वडासदस्य गोबिन्दा मण्डल मार्फत पीडितकालागि आएको राहत रकमबाट कमिशन उठाउने गरेको बताएका छन ।
बाढी पीडितकालागि पछिल्लो समय सरकारबाट घर बनाउनकालागि उपलब्ध गराइएको प्रति परिवार २५ हजारको राहत रकमबाट १ हजारदेखि १० हजारसम्म कमिशन उठाउने गरेको पत्रकार सम्मेलनमा आएका पीडितहरुले खुलासा गरेका छन । रंगेली ४ का ८० बर्षिय अति विपन्न बुलाई मण्डलले २५ हजारको राहत रकमबाट आफुलाई ५ हजार बुझाउन बाध्य पारिएको बताए ।
सोहि ठांउकी सुनिता ऋषिदेवले आफुसंग ७ हजार रकम असुलिएको गुनासो गरिन् । सुनिताकी बुहारी पारोदेवि ऋषिदेव समेत सोहि वडाको सदस्य रहेका कारण उनलाई समेत २ हजार भाग लगाईएको पत्रकार सम्मेलनमा जानकारी गराइएको थियो ।पत्रकार सम्मेलनमा समेत आएकी वडासदस्य पारो ऋषिदेवले आफुलाई २ हजारको भाग लगाईएपनि आफ्नै सासुको भागको रकम नलिने भन्दै सुनितालाई नै फिर्ता गरेको जानकारी दिए । सो वडाका वडाध्यक्ष र वडासदस्यहरुले आपसी मिलेमतोगरि यसअघि आएको तत्कालिन राहत रकमबाट समेत बाढी पीडितको भागबाट रकम असुलेको पीडितहरुले जानकारी दिएका छन ।
बाढी पीडितलाइ घर बनाउनकालागि पछिल्लो पटक आएको २५ हजारको रकमबाट उनिहरुले प्राय सबैबाट रकम असुलेको पीडितहरुको दाबी छ । यता सो बिषयमा टेलिफोनमा प्रतिक्रिया दिँदै आरोप लगाइएका वडाध्यक्ष भुपेन्द्र मण्डलले आफुले कुनैपनि ब्यक्तिसंग रकम असुल्न नलगाएको दाबी गरे ।
अन्य सदस्यहरुले के गरे बिषयमा छानबीन हुनुपर्ने बताउदै उनले विपक्षिहरुले अनावश्यकरुपमा आफुलाई विवादमा तान्ने प्रयास गरिरहेको दाबी समेत गरे । रंगेली नगरपालिकाको सो वडामा ६५ जना पुर्ण र २१३ जना आंशिक बाढी पीडित भएको जनाइएको छ ।
