१९ माघ, चितवन ।
कोभिड–१९ को संक्रमणका कारण सुस्ताएको पर्यटन व्यवसाय विस्तारै चलायमान बन्दै गएको छ ।
अंग्रेजी नयाँ वर्षसँगै सौराहामा आन्तरिक पर्यटक क्रमशः बढ्दो क्रममा रहेका छन् । व्यवसायीले अंग्रेजी नयाँ वर्ष अघि ‘घुमौँ सौराहा’ अभियान गरेका थिए । त्यति बेला उनीहरूले प्रदेश नम्बर–२ र ३ का मुख्य सहरी क्षेत्रमा पुगेर अभियान चलाएका थिए ।
व्यवसायीले विराटनगर, धरान, जनकपुरलगायत पूर्वी नेपालका मुख्य–मुख्य सहरमा कार्यक्रम गरेका थिए । ती कार्यक्रममा नेपाल सरकारको पर्यटन बोर्ड र स्थानीय तहहरूको सहयोग रहेको थियो ।
क्षेत्रीय होटेल संघ चितवनका अध्यक्ष दीपक भट्टराईका अनुसार अभियानसँगै पूर्वी नेपालका पर्यटक पनि सौराहा आउन थालेका छन् । पारिवारिक र युवायुवती घुम्न आउने क्रम बढेको छ ।
उनले भने, ‘‘विगतमा विद्यार्थी बढी आउँथे, अहिले पारिवारिक भ्रमण आउने बढी छन् ।’’ शुक्रबार र शनिबारसँगै बिदाको दिनमा आधाभन्दा बढी होटेल भरिन थालेका छन् । अन्य दिनमा पनि यो संख्या ४० प्रतिशत हाराहारी हुने गरेको उनले जानकारी दिए ।
कोभिड–१९ संक्रमणपछि ठप्प रहेका सबै होटल खुल्न थालेका छन् । व्यवसायीमा पनि उत्साह थपिएको उनले बताए । संघका पूर्वअध्यक्ष एवं अभियानका संयोजक सुमन घिमिरेले कार्यक्रमले राष्ट्रिय रूपमा नै प्रचारप्रसार भएको बताए ।
जसका कारण पर्यटक आगमनमा सकारात्मक प्रभाव परेको भन्दै उनले यसै महिना अन्य प्रदेशका सहरमा पनि अभियान लिएर जाने तयारी गरिएको जानकारी दिए । उनले भने, ‘‘यस्ता अभियान र स्थानीय सञ्चारमाध्यममा नियमित प्रचारप्रसार गर्न सकेमा आन्तरिक पर्यटक भित्र्याउन सकिन्छ ।’
रेष्टुराँ एन्ड बार एसोसिएसन ९रेवान० सौराहाका अध्यक्ष दीपेन्द्र खतिवडाले पछिल्ला दिनहरूमा आन्तरिक पर्यटकको निकै राम्रो उपस्थिति रहेको बताए । बिदाका दिनमा भिडभाड हुने गरेको भन्दै उनले अन्य दिनमा पनि पर्यटकको आगमन सन्तोषजनक हुँदै गएको जानकारी दिए ।
अभियान सौराहाका लागि महत्वपूर्ण बनेको भन्दै उनले यहाँको महत्वको बारेमा देशभर प्रचारप्रसार गर्न सकेमा पर्यटक भित्र्याउन सकिने अभियानले पाठ सिकाएको बताए ।
सौराहामा अहिले होटेल, रेष्टुराँले आन्तरिक पर्यटकलाई २० देखि ४० प्रतिशत छुट दिँदै आएका छन् । नेपालमै रहेका र बाहिरबाट आएका विदेशी पर्यटक पनि आउन थालेको खतिवडाले जानकारी दिए ।
चितवन राष्ट्रिय निकुञ्जमा वन, वनस्पति र वन्यजन्तु अवलोकनका लागि यहाँ पर्यटक आउने गर्दछन् । दुर्लभ एकसिंगे गैँडा, बाघ, घडियाल गोही यहाँका मुख्य आकर्षक हुन् ।
यहाँ हात्ती सयर, डुंगा सयर, जीप सफारी, पैदलयात्रामार्फत निकुञ्ज र मध्यवर्ती क्षेत्र भ्रमण गराइने गरिन्छ । सौराहामा ठूला साना १४० होटेल छन् भने करिब ५० रेष्टुराँ सञ्चालनमा छन् । (रासस)
