२१ माघ, सुनसरी।
सुनसरीको इनरुवा नगरपालिका २ बलाहा नहरबाट प्रहरीले २ सय ५० केजी गाँजा सहित २ जनालाई पक्राउ गरेको छ ।
को १ च ९८५२ नम्बरको बलेरो गाडीमा ठूलो परिणाममा गाँजा तस्करी भईरहेको भन्ने बिशेष सूचनाका आधारमा ईलाका प्रहरी कार्यालय महेन्द्रनगरबाट बुधबार गएको प्रहरी टोलीले ब्यारिकेट सहित चेकिङ राखेकोमा बराहक्षेत्रबाट आएको उक्त नम्बरको गाडी ब्यारिकेट लडाएर फरार भएको थियो ।
ब्यारिकेटलाई क्षति गरी फरार भएको उक्त गाडीलाई जिल्ला प्रहरी कार्यालय सुनसरीबाट खटिएको प्रहरी टोलीले बलाहा नहरबाट बिहान पौने ४ बजे नियन्त्रणमा लिएको हो । ब्यारिकेट लडाएर भागेको उक्त गाडीलाई नियन्त्रण लिन १ राउण्ड फायर समेत भएको थियो भने उक्त गाडीले भाग्ने क्रममा को १ ब २४३६ र को १ ब २१०५ नम्बरको मोटरसाईकललाई समेत क्षति र्पुयाएको तथा १ जना प्रहरी समेत घाईते भएका छन् । कोशीपुलबाट भागेको उक्त गाडीलाई बलाहा नहरबाट राती नै नियन्त्रणमा लिएको हो ।
गाडीसंगै चालक भोजपुर हतुवागढी गाउँपालिका ९ का २७ बर्षीय अर्जुन खड्का र गाडीमा सवार रहेका धरान १ का २६ बर्षीय ज्याक्सन श्रेष्ठलाई पक्राउ गरिएको तथा गाडीमा रहेको २५० के.जी गाँजा, नगद १ लाख ५४ हजार र १ थान खुकुरी समेत बरामद भएको प्रदेश १ प्रहरी कार्यालयले जनाएको छ।
