२५ माघ, विराटनगर ।
नेपाल अग्रवाल युवा मञ्च विराटनगरको आयोजनामा विराटनगरमा मारवाडी प्रीमियर लिगको आठौं संस्करण आयोजना हुने भएको छ । फागुन ५ गतेदेखि ८ गतेसम्म विराटनगर २ स्थित शंकरपुर मार्गमा मारवाडी समुदायका विभिन्न टिमहरुबीच मैत्रीपूर्ण क्रिकेट प्रतियोगिता आयोजना हुने भएको हो ।
प्रतियोगिताको प्रवर्धनका निमित्त यही फागुन ४ गते दिउँसो ३ बजेदेखि अतिथि सदनबाट मोटरसाईकल र्याली समेत आयोजना गर्न लागेको आयोजक समितिले जनाएको छ । मारवाडी युवाहरुबीच खेलकुद प्रति अभिरुचि जगाई राख्न यस्ता प्रतियोगिताहरुलाई निरन्तरता दिइरहने मंचका प्रचम उपाध्यक्ष प्रदीप अग्रवालले जानकारी दिए ।
प्रतियोगितामा नेपाल अग्रवाल युवा मंचको केएसबी रोयल्स, महेश्वरी युवा मंचको प्रीमियर एलाभन विराटनगर, ओस्वाल युवा मंचको तर्फबाट महालक्ष्मी एलाभन, नेपाल मारवाडी ब्राह्मण युवा मंचबाट पर्शुराम वारियर्स र मेंढ स्वर्णकार युवा मंचको तर्फबाट सोनी रोयल्स गरी जम्मा ५ टिमहरु सहभागी हुँदैछन् । सहभागी टिमबीच १० वटा लिग म्याच खेलिनेछ र अंकको आधारमा फाइनल खेल शनिबार फागुन ८ गते विहान ११ बजे हुनेछ ।
प्रतियोगितामा विजयी टिमले ट्रफीका साथै नगद ४१ हजार रुपैयाँ पाउनेछन् र दोस्रो हुनेले ट्रफीसहित नगद १५ हजार रुपैयाँ पाउनेछन् । हरेक खेलका “म्यान अफ दी म्याच” लाई ट्रफीका साथै २ हजार १ सयका दरले नगद पनि प्रदान गरिनेछ । म्यान अफ दि सिरिजलाई ट्रफीसहित ५ हजार १ सय रुपैयाँ दिइनेछ भने उत्कृष्ट बलर, ब्याट्स म्यान, बेस्ट इमर्जिङ प्लेयरलाई ट्रफीसहित ३ हजार १ सय रुपैयाँ पनि प्रदान गरिनेछ । त्यस्तै बेस्ट डिसिप्लिनड टिमलाई ट्रफीले सम्मान गरिनेछ ।
